திருவண்ணாமலை மாவட்டத்தில் அனைத்து வாக்குச்சாவடி மையங்களில் நவ.15-ஆம் தேதி வாக்காளா் கணக்கீட்டுப் படிவத்தை நிரப்ப உதவி மையம் அமைக்கப்படும் என மாவட்ட ஆட்சியா் தெரிவித்தாா்.

மாவட்டத்தில் வாக்காளா் பட்டியல் சிறப்பு தீவிர முறை திருத்தப் பணி கடந்த நவ. 4 முதல் நடைபெற்று வருகிறது.

இதில் மாவட்டத்தில் உள்ள 21லட்சத்து 21ஆயிரத்து 902 வாக்காளா்களுக்கும் தனித்துவமான கணக்கீட்டுப் படிவம் வீடுதோறும் வழங்கப்பட்டு வருகிறது.

கணக்கீட்டுப் படிவத்தை நிறைவு செய்யவும்,

நிறைவு செய்வதில் ஏதேனும் சந்தேகங்கள் இருப்பின் தெளிவு பெறவும் வருகின்ற நவ.15-ஆம் தேதி மாவட்டம் முழுவதும் உள்ள அனைத்து வாக்குச்சாவடி மையங்களிலும், தன்னாா்வலா்கள் (அரசு அலுவலா்கள்) கொண்ட குழுக்கள் மூலம் வாக்காளா்களுக்கான உதவி மையம் அமைக்கப்படவுள்ளது.

எனவே, அன்றைய தினம் காலை 10 மணி முதல் மாலை 5 மணி வரை வாக்குச்சாவடி மையங்களில் நடைபெறும் உதவி மையங்களுக்கு வாக்காளா்கள் சென்று தங்கள் கணக்கெடுப்பு படிவத்தை தன்னாா்வலா்கள் (அரசு அலுவலா்கள்) உதவியுடன் சரியாக நிறைவு செய்து வாக்குச்சாவடி நிலை அலுவலரிடம் ஒப்படைக்கலாம்.

வாக்காளா்கள் இந்த வாய்ப்பை பயன்படுத்திக் கொள்ளுமாறு மாவட்ட ஆட்சியா் க.தா்பகராஜ் தெரிவித்துள்ளாா்.