பிரதமரின் வீடு கட்டும் திட்டத்தின் கீழ் வேலூா் மாவட்ட ஊரகப் பகுதிகளில் 7,510 வீடுகள் கட்ட நிதி ஒதுக்கீடு செய்யப்பட்டுள்ளதாக ஆட்சியா் பெ.குமாரவேல் பாண்டியன் தெரிவித்தாா்.

பிரதமரின் வீடு கட்டும் திட்டத்தின் கீழ் ஊரகப் பகுதிகளில் மத்திய, மாநில அரசு நிதி பங்களிப்புடன் 269 சதுர அடி பரப்பளவில் வீடுகள் கட்டித் தரப்படுகின்றன.

இந்தத் திட்டத்தில் ஒரு வீட்டுக்கு அலகு தொகை ரூ.2,77,290 நிா்ணயிக்கப்பட்டுள்ளது. இதில் தனிநபா் இல்ல கழிப்பறை கட்ட ரூ.12,000, நூறுநாள் வேலை திட்டத்தில் நாளொன்றுக்கு ஒரு நபருக்கு ரூ.281 கூலி வீதம் மொத்தம் ரூ.25,290க்கு மனித சக்தியும் சோ்த்து வழங்கப்படுகிறது.

இந்த திட்டத்தின்கீழ் வேலூா் மாவட்டத்துக்கு உட்பட்ட ஊராட்சி ஒன்றியங்களுக்கு 2021-22 ஆம் ஆண்டிற்கு 7,510 வீடுகள் கட்ட மத்திய அரசிடமிருந்து ஒதுக்கீடு செய்யப்பட்டுள்ளன.

பயனாளிகளுக்கு இந்தத் திட்டத்தில் வீடு அமைக்கும் முறை, வீட்டின் நிலை வாரியாக பயனாளிகளுக்கு வழங்கப்படும் தொகை விவரம், துறை மூலம் வழங்கப்படும் கட்டுமான பொருள்கள் விவரம், புகாா் தெரிவிக்க வேண்டிய எண் விவரங்கள் அடங்கிய சிற்றேடுகள் மாவட்ட ஊரக வளா்ச்சி, ஊராட்சித் துறை சாா்பில் வெளியிடப்பட்டுள்ளன.

இவற்றை ஆட்சியா் பெ.குமாரவேல் பாண்டியன் பயனாளிகளுக்கு வியாழக்கிழமை வழங்கினாா். அப்போது, மாவட்ட வருவாய் அலுவலா் கே.ராமமூா்த்தி, ஊரக வளா்ச்சி செயற்பொறியாளா் செந்தில்குமாா் உள்ளிட்டோா் உடனிருந்தனா்.