பொன்னை ஆற்றின் குறுக்கே ரூ.12.94 கோடியில் தரைப்பாலம்: அமைச்சா் துரைமுருகன் திறந்து வைத்தாா்

பொன்னை ஆற்றின் குறுக்கே ரூ.12.94 கோடியில் கட்டப்பட்ட தரைப்பாலத்தை அமைச்சா் துரைமுருகன் மக்கள் பயன்பாட்டுக்கு சனிக்கிழமை திறந்து வைத்தாா். மேலும் ரூ.13.29 கோடியில் முடிவுற்ற திட்டப் பணிகளைத் தொடங்கி வைத்தும், ரூ.1.30 கோடியில் புதிய ஆரம்ப சுகாதார நிலையம் கட்ட அடிக்கல் நாட்டினாா். காட்பாடி ஊராட்சி ஒன்றியம் மேல்பாடி ஊராட்சி பொன்னை ஆற்றின் குறுக்கே நீா்வளத் துறை சாா்பில் ரூ.12.94 கோடி மதிப்பில் கட்டப்பட்டுள்ள தரைப்பாலத்தையும், கோட்டநத்தம் கிராமத்தில் ரூ.13.57 லட்சம் மதிப்பில் கட்டப்பட்டுள்ள அங்கன்வாடி மையம், சின்னகீசகுப்பம் கிராமத்திலும், பொன்னை ஊராட்சி கீரைசாத்து கிராமத்திலும் காட்பாடி சட்டப்பேரவைத் உறுப்பினா் தொகுதி மேம்பாட்டு நிதி கீழ் தலா ரூ.11 லட்சம் மதிப்பில் கட்டப்பட்டுள்ள பயணிகள் நிழற்கூடங்கள் ஆகியவற்றை நீா்வளத்துறை அமைச்சா் துரைமுருகன் திறந்து வைத்தாா். கரிகிரியில் கட்டப்பட்டுள்ள அடுக்குமாடி குடியிருப்பில் வீடு பெறுவதற்காக 16 பேருக்கு வீடு ஒதுக்கீடு ஆணை வழங்கினாா். பொன்னை ஊராட்சியில் 15-ஆவது மத்திய நிதி குழு மானிய திட்டத்தின் கீழ் ரூ.1.30 கோடி மதிப்பில் ஆரம்ப சுகாதார நிலையம் கட்ட அடிக்கல் நாட்டினாா். பின்னா், அமைச்சா் துரைமுருகன் பேசியது: பொன்னை ஆற்றின் குறுக்கே நீா்வளத் துறை சாா்பில் ரூ.12.94 கோடி மதிப்பில் இந்த புதிய பாலம் கட்டப்பட்டுள்ளது. பாலம் கட்டப்பட்டுவிட்டாலும் இந்த பகுதியில் சாலை வசதிகள் மேம்படுத்தப்பட வேண்டிய நிலையில் உள்ளது. தோ்தல் முடிவடைந்த பிறகு இந்த சாலைகள் சீரமைப்பதற்கான நடவடிக்கை மேற்கொள்ள ஒன்றியக் குழு தலைவருக்கு அறிவுறுத்தப்பட்டுள்ளது. மேல்பாடி கிராமத்தில் ராஜராஜ சோழனால் கட்டப்பட்ட கோயிலுக்கு விரைவில் மத்திய தொல்லியல் துறை அனுமதி பெற்று மிகப்பெரிய அளவில் கும்பாபிஷேகம் நடத்தப்பட்டு, பக்தா்கள் தங்குவதற்கான இடமும் ஏற்படுத்தப்படும் என்றாா். தொடா்ந்து செய்தியாளா்களிடம் கூறுகையில், திமுகவும் காங்கிரஸும் ஊழல் கூட்டணி என்றும், அக்கட்சிகளை வீழ்த்துவதே எனது முதல் வேலை என்றும் பிரதமா் கூறியுள்ளாா். அவா் இவ்வாறு பேசியிருப்பது அழகான செயல் அல்ல என்றாா். நிகழ்ச்சியில் மாவட்ட ஆட்சியா் வி.ஆா்.சுப்புலட்சுமி, காட்பாடி ஒன்றியக் குழு தலைவா் வேல்முருகன், மேல் பாலாறு வடிநில கோட்ட கண்காணிப்பு பொறியாளா் ரமேஷ், செயற்பொறியாளா் பிரபாகா், தமிழ்நாடு நகா்ப்புற வாழ்விட மேம்பாட்டு வாரிய செயற்பொறியாளா் செந்தில் முருக ஜெயக்குமாா், வேலூா் கோட்டாட்சியா் கவிதா உள்ளிட்டோா் பங்கேற்றனா்.