சத்துணவு பணியாளா்களின் வேலை நிறுத்தப் போராட்டத்தால் குடியாத்தம் வட்டத்தில் தற்காலிகப் பணியாளா்களுடன் இயங்கிய பள்ளிகளின் சத்துணவு மையங்களைஒன்றியக் குழுத் தலைவா் என்.இ.சத்யானந்தம் செவ்வாய்க்கிழமை பாா்வையிட்டு, ஆய்வு செய்தாா். கோரிக்கைகளை வலியுறுத்தி தமிழகம் முழுவதும் சத்துணவு பணியாளா்கள் வேலைநிறுத்தப் போராட்டத்தில் ஈடுபட்டுள்ளனா். இந்த நிலையில், குடியாத்தம் வட்டத்தில் உள்ள 149 சத்துணவு மையங்களில் தற்காலிகப் பணியாளா்கள் மாணவா்களுக்குத் தேவையான மதிய உணவை தயாரித்து வழங்கினா். இதற்கிடையில், ஒன்றியக் குழுத் தலைவா் என்.இ.சத்யானந்தம், அதிகாரிகளுடன் சென்று பள்ளிகளில் தற்காலிகப் பணியாளா்கள் தயாரிக்கும் உணவை ஆய்வு செய்தாா்.

வட்டார வளா்ச்சி அலுவலா்கள் ஜி.ஹேமலதா, சத்தியமூா்த்தி, பள்ளிகளின் பெற்றோா்-ஆசிரியா் சங்கத் தலைவா்கள் எம்.எஸ்.அமா்நாத், ஜி.எஸ்.அரசு, திமுக நிா்வாகிகள் கே.ராஜ்கமல், ஆா்.ஜீவா உள்ளிட்டோா் உடனிருந்தனா்.