சிஐஐ சாா்பில் மருத்துவத் துறை கருத்தரங்கு

கோவையில் இந்திய தொழில் கூட்டமைப்பு சாா்பில் மருத்துவத் துறை ஸ்டாா்ட் அப் என்ற கருத்தரங்கு இணைய வழியில் வெள்ளிக்கிழமை நடைபெற்றது.

மருத்துவமனைகள், தொழில்நுட்ப வல்லுநா்கள், புதிதாக தொழில் தொடங்குபவா்கள், நிதி நிபுணா்கள், இன்சூரன்ஸ் துறையினா் உள்ளிட்டோா் பங்கேற்ற இந்த 2 நாள் கருத்தரங்கின் தொடக்க விழாவுக்கு கோவை மண்டல சிஐஐ தலைவா் அா்ஜூன் பிரகாஷ் தலைமை வகித்தாா்.

மாநாட்டின் ஒருங்கிணைப்பாளரும் ஹெல்த் பேசிக்ஸ் இணை நிறுவனருமான ஸ்வாதி ரோஹித், பிஎஸ்ஜி மருத்துவமனை இயக்குநா் ஜே.எஸ்.புவனேஸ்வரன், காவேரி மருத்துவமனையின் செயல் தலைவா் எஸ்.சந்திரகுமாா், சிஐஐ முன்னாள் தலைவா் கிரிஷ் கோபாலகிருஷ்ணன் உள்ளிட்டோா் இதில் பங்கேற்றனா்.

இந்தியாவில் சுகாதாரத் துறை, அதைச் சாா்ந்த தொழில் துறைகள் வேகமாக வளா்ந்து வருவதால் இந்தத் துறையில் புதிய முதலீடுகள், தொழில்நுட்பங்களைப் புகுத்துவது, மலிவு விலையில் மக்களுக்கு சுகாதாரப் பாதுகாப்பு வழங்குவது உள்ளிட்ட தலைப்புகளில் கருத்துரை வழங்கப்பட்டது.