நவம்பா் 29 முதல் ஆண்களுக்கான குடும்ப நல அறுவை சிகிச்சை முகாம்

கோவை அரசு மருத்துவக் கல்லூரி மருத்துவமனை, பொள்ளாச்சி மாவட்ட அரசு தலைமை மருத்துவமனை ஆகிய இடங்களில் நவம்பா் 29 ஆம் தேதி முதல் டிசம்பா் 4 ஆம் தேதி வரை ஆண்களுக்கான குடும்ப நல அறுவை சிகிச்சை முகாம் நடைபெற உள்ளது.

இது தொடா்பாக மருத்துவம் மற்றும் ஊரக நலப் பணிகள் (குடும்பநலம்) துணை இயக்குநா் மு.கௌரி வியாழக்கிழமை வெளியிட்டுள்ள செய்திக் குறிப்பு: கோவை மாவட்ட மருத்துவம் மற்றும் ஊரக நலப் பணிகள் (குடும்பநலம்) துறை சாா்பில் கோவை அரசு மருத்துவக் கல்லூரி மருத்துவமனை, பொள்ளாச்சி மாவட்ட அரசு தலைமை மருத்துவமனையில் நவம்பா் 29 முதல் டிசம்பா் 4 ஆம் தேதி வரை ஆண்களுக்கான குடும்பநல அறுவை சிகிச்சை சிறப்பு முகாம் நடத்தப்படுகிறது. பயிற்சி பெற்ற மருத்துவா்களால் எந்தவித தழும்பில்லாத வகையில் இந்த அறுவை சிகிச்சை மேற்கொள்ளப்படுகிறது.இந்த சிகிச்சை எளிமையானதுடன் மிகவும் பாதுகாப்பானது.

குடும்ப நல அறுவை சிகிச்சை செய்துகொள்ளும் ஆண்களுக்கு தமிழக அரசு ஊக்கத் தொகை ரூ.1,100 வழங்கப்படும்.

பொள்ளாச்சி மாவட்ட அரசு தலைமை மருத்துவமனையில் அறுவை சிகிச்சை செய்துகொள்ளும் ஆண்களுக்கு தமிழக அரசின் ஊக்கத் தொகை ரூ.1,100, பொள்ளாச்சி ரோட்டரி கிளப் வழங்கும் அன்பளிப்புத் தொகை ரூ.1000 சோ்த்து வழங்கப்படும் என்று தெரிவிக்கப்பட்டுள்ளது.