கோவை மாநகராட்சி வாா்டு உறுப்பினா்களுக்கு வழங்கப்படும் மேம்பாட்டு நிதியை ரூ.10 லட்சமாக உயா்த்த வேண்டும் என்று மாநகராட்சி கூட்டத்தில் வலியுறுத்தப்பட்டது.

கோவை மாநகராட்சி மாமன்ற உறுப்பினா்களின் சாதாரண கூட்டம் மாநகராட்சி மேயா் கல்பனா ஆனந்தகுமாா், ஆணையா் மு.பிரதாப் ஆகியோா் தலைமையில் திங்கள்கிழமை நடைபெற்றது. துணைமேயா் இரா.வெற்றிச்செல்வன் முன்னிலை வகித்தாா்.

இதில் கிழக்கு மண்டலத் தலைவா் இலக்குமி இளஞ்செல்வி பேசும்போது, மாநகராட்சி 100 வாா்டுகளிலும் மியாவாக்கி முறையில் மரக்கன்றுகள் நடவு செய்யப்படும் என்று அறிவிக்கப்பட்டது. ஆனால், ஒருசில வாா்டுகளில் மட்டுமே செயல்படுத்தப்பட்டுள்ள இத்திட்டம் பெரும்பாலான வாா்டுகளில் கிடப்பில் போடப்பட்டுள்ளது என்றாா்.

மத்திய மண்டலத் தலைவா் மீனா லோகு: மாநகராட்சியில் மழைநீா் வடிகால்கள் மிகவும் மோசமான நிலையில் உள்ளது. பெரும்பாலான இடங்களில் தனியாா் சாா்பில் மழைநீா் வடிகால்கள் அடைக்கப்பட்டுள்ளன. மழைநீா் வடிகால் முறையாக தூா்வாரப்படாததால் மழைக்காலத்தில் மழைநீா் செல்ல வழியில்லாமல் சாலையில் பெருக்கெடுத்து ஓடுகிறது.

கல்வி, பூங்கா குழுத் தலைவா் மாலதி: மாநகராட்சிப் பள்ளிகளில் மாணவா்களுக்கு இலவச நாப்கின் வழங்கும் வெண்டிங் மெஷின் வைக்க வேண்டும். பள்ளிகளை பராமரிப்பதற்கு கூடுதல் தூய்மைப் பணியாளா்கள் நியமிக்க வேண்டும்.

ஆளுங்கட்சித் தலைவா் காா்த்திகேயன்: ஒவ்வொரு வாா்டிலும் மாநகராட்சி உறுப்பினா்களுக்கு வாா்டு அலுவலகம் அமைக்க வேண்டும். குறிச்சி குளக்கரையில் நடைபெற்று வரும் பொலிவுறு நகரத் திட்ட பணிகளை விரைந்து முடிக்க வேண்டும்.

இந்திய கம்யூனிஸ்ட் தலைவா் மல்லிகா: மாநகராட்சியில் நடைபெற்று வரும் அம்மா உணவகம், இல்லம் தேடி கல்வித் திட்டம் உள்ளிட்ட திட்டங்களில் மூன்றாம் பாலினத்தவா்களுக்கு வேலைவாய்ப்பு வழங்க வேண்டும்.

மாா்க்சிஸ்ட் தலைவா் ராமமூா்த்தி: மாநகராட்சிக்கு தேவைக்கு அதிகமாகவே குடிநீா் கிடைக்கிறது. ஆனால், முறையற்ற குடிநீா் விநியோகத்தால் பெரும்பாலான வாா்டுகளில் குடிநீா் பற்றாக்குறை நிலவுகிறது.

அதிமுக தலைவா் பிரபாகரன்: வெள்ளலூா் பேருந்து நிலையத்தை இடமாற்றம் செய்யும் திட்டத்தை கைவிட வேண்டும். இதற்காக மாநகராட்சியில் ரூ.32 கோடி நிதி செலவிடப்பட்டுள்ளது. மாநகராட்சி வரி சீரமைப்பு செய்யப்பட்டதில் உள்ள குளறுபடிகளுக்கு தீா்வு காண வேண்டும். மாநகராட்சிப் பள்ளிகளில் குடிநீா் சுத்திகரிப்பு கருவிகள், ஸ்மாா்ட் வகுப்பறைகள் பயன்பாடில்லாமல் உள்ளன.

சூயஸ் திட்டத்தால் பாதிப்பு...

கூட்டத்தில் பெரும்பாலான வாா்டு உறுப்பினா்கள் பேசும்போது, மாநகராட்சியில் செயல்படுத்தப்பட்டு வரும் சூயஸ் திட்டத்தில் குழாய் பதிப்புக்காக தோண்டப்படும் குழிகள் முறையாக மூடப்படுவதில்லை. இதனால் மழைக் காலங்களில் பள்ளத்தில் மழைநீா் தேங்கி பாதிப்பை ஏற்படுத்தி வருகிறது. இது தொடா்பாக சூயஸ் திட்ட அதிகாரிகளிடம் தெரிவித்தாலும் முறையான பதில் அளிப்பதில்லை. எனவே சூயஸ் நிறுவனத்தின் மீது உரிய நடவடிக்கை எடுக்க வேண்டும்.

மேலும், மாநகராட்சி வாா்டு உறுப்பினா்களுக்கு வழங்கப்படும் வாா்டு நிதி ரூ.5 லட்சத்தை, ரூ.10 லட்சமாக உயா்த்தி வழங்க வேண்டும். மாநகராட்சியில் 10 ஆண்டுகளுக்கு மேலாக பணியாற்றி வரும் ஒப்பந்த தூய்மைப் பணியாளா்களை பணி நிரந்தரம் செய்ய வேண்டும். பாதாள சாக்கடை திட்டப் பணிகள், சாலை வசதிகள், தெருவிளக்குள் உள்ளிட்ட அடிப்படை வசதிகளை மேம்படுத்த வேண்டும். குடிநீா்த் தட்டுப்பாட்டுக்கு தீா்வு காண வேண்டும் என்றனா். இந்த கூட்டத்தில் மாநகராட்சியின் 14 வாா்டு உறுப்பினா்கள் பங்கேற்கவில்லை.