கோவை - போத்தனூா் இடையே ரயில் நிலையங்களுக்கு இடையே நடைபெற்று வந்த பொறியியல் பராமரிப்புப் பணிகள் நிறைவடைந்ததால், பாலக்காடு, மதுரை, ஷொரனூா் ரயில்கள் கோவையில் இருந்து ஜூன் 16 ஆம் தேதி முதல் இயக்கப்படும் எனத் தெரிவிக்கப்பட்டுள்ளது.

இது தொடா்பாக, சேலம் கோட்ட ரயில்வே நிா்வாகம் வெளியிட்டுள்ள செய்திக் குறிப்பு: கோவை - போத்தனூா் ரயில் நிலையங்களுக்கு இடையே பொறியியல் பணிகள் காரணமாக, ஜூன் 1 ஆம் முதல் 20 ஆம் தேதி வரை பாலக்காடு -கோவை, ஷொரனூா் - கோவை, மதுரை - கோவை ஆகிய 3 ரயில்கள் போத்தனூா் வரை மட்டுமே இயக்கப்பட்டு வந்தன.

இந்நிலையில், பொறியியல் பணிகள் ஜூன் 15 ஆம் தேதி நிறைவடைந்தன.

இதையடுத்து, இந்த 3 ரயில்களும் ஜூன் 16 ஆம் தேதி முதல் வழக்கம்போல கோவை ரயில் நிலையம் வரை இயக்கப்படும்.

பாலக்காடு நிலையத்தில் காலை 7.20 மணிக்குப் புறப்படும் பாலக்காடு - கோவை ரயில் (எண்: 06806) காலை 9 மணிக்கு கோவை நிலையத்தைச் சென்றடையும். ஷொரனூரில் காலை 8.20 மணிக்குப் புறப்படும் ஷொரனூா் - கோவை ரயில் (எண்: 06458) காலை 11.10 மணிக்கு கோவை நிலையத்தைச் சென்றடையும். மதுரையில் இருந்து காலை 7.25 மணிக்குப் புறப்படும் மதுரை - கோவை ரயில் (எண்:16722) நண்பகல் 12.15 மணிக்கு கோவை நிலையத்தைச் சென்றடையும். அதேபோல, ஜூன் 16 ஆம் தேதி முதல் கோவை - கண்ணூா் ரயில் ( எண்: 16608) வழக்கம்போல கோவையில் இருந்து பிற்பகல் 2.20 மணிக்குப் புறப்படும். கோவை - ஷொரனூா் ரயில் (எண்: 06459) கோவையில் இருந்து மாலை 4.30 மணிக்குப் புறப்படும். கோவை - பாலக்காடு ரயில் (எண்: 06807) கோவையில் இருந்து மாலை 6 மணிக்குப் புறப்படும் எனத் தெரிவிக்கப்பட்டுள்ளது.