கஞ்சா விற்பனை செய்த வழக்கில் கைது செய்யப்பட்ட இளைஞருக்கு 3 ஆண்டுகள் கடுங்காவல் சிறைத் தண்டனை விதித்து, கோவை போதைப்பொருள் தடுப்புச் சட்ட சிறப்பு நீதிமன்றம் புதன்கிழமை தீா்ப்பளித்தது.

தேனி மாவட்டம், வடுகப்பட்டியைச் சோ்ந்தவா் மொக்கையா மகன் கருப்பையா (38). இவா் கடந்த 12.10.2021 -இல் ஈரோடு மாவட்டம், சின்னத்தம்பிபாளையம் பேருந்து நிறுத்தம் அருகே கஞ்சா விற்பனை செய்வதாக கிடைத்த தகவலின்பேரில் அந்தியூா் போலீஸாா் சென்று கருப்பையா வைத்திருந்த பையில் சோதனை செய்ததில் 2 கிலோ கஞ்சா இருந்தது தெரியவந்தது. இதையடுத்து அவரை போலீஸாா் கைது செய்தனா்.

இதுதொடா்பான வழக்கு கோவை இன்றியமையா பொருள்கள் மற்றும் போதைப்பொருள் தடுப்புச் சட்ட சிறப்பு நீதிமன்றத்தில் நடைபெற்று வந்தது. வழக்கு விசாரணை முடிவடைந்த நிலையில் கருப்பையாவுக்கு 3 ஆண்டுகள் கடுங்காவல் சிறைத் தண்டனையும், ரூ. 25 ஆயிரம் அபராதமும் விதித்து நீதிபதி ராஜலிங்கம் புதன்கிழமை தீா்ப்பளித்தாா். இந்த வழக்கில் அரசுத் தரப்பில் சிறப்பு வழக்குரைஞா் வெ.சிவகுமாா் ஆஜரானாா்.