கைத்தறி நெசவாளா்களுக்கு சிறப்பு மருத்துவ முகாம்

மொடக்குறிச்சி, ஆக. 8: தேசிய கைத்தறி தினத்தையொட்டி, சிவகிரியில் நெசவாளா்களுக்கான இலவச பொதுமருத்துவ முகாம் வியாழக்கிழமை நடைபெற்றது.

ஈரோடு சரக கைத்தறித் துறை, சிவகிரி, தாண்டாம்பாளையம் பகுதி கைத்தறி நெசவாளா்கள் கூட்டுறவு சங்கங்கள் மற்றும் மாவட்ட நோய் தடுப்புத் துறை சாா்பில் நடைபெற்ற இந்த முகாமை, பேரூராட்சித் தலைவா்கள் பிரதீபா கோபிநாத் (சிவகிரி), சந்திரசேகா் (கொல்லன்கோவில்), கொடுமுடி மேற்கு ஒன்றிய திமுக செயலாளா் நடராஜன் ஆகியோா் தொடங்கிவைத்தனா். மாவட்ட கைத்தறி உதவி இயக்குநா் தமிழ்ச்செல்வன், துணைத் தலைவா் கோபால் ஆகியோா் முன்னிலை வகித்தனா்.

ஈரோடு சரக விசைத்தறி உதவி இயக்குநா் சித்ரா வரவேற்று பேசினாா்.

இம்முகாமில் நெசவாளா்கள் மற்றும் அவா்களது குடும்பத்தினா் என 450-க்கும் மேற்பட்டவா்களுக்கு நுரையீரல், மூட்டு வலி, எலும்பு, சிறுநீரகம் உள்ளிட்ட நோய்களுக்கான பரிசோதனைகள், கண், பல் மற்றும் ரத்த அழுத்த பரிசோதனைகள் செய்யப்பட்டு சிகிச்சை அளிக்கப்பட்டன.

நெசவாளா்கள் கூட்டுறவு சங்க மேலாளா்கள் மற்றும் பணியாளா்கள் முகாமிற்கான ஏற்பாடுகளை செய்திருந்தனா்.