அவல்பூந்துறை பேரூராட்சி சாா்பில் புதன்கிழமை நடைபெற்ற சமத்துவப் பொங்கல் விழாவில் மாவட்ட ஆட்சியா் ச.கந்தசாமி உறியடிக்கும் போட்டியில் கலந்துகொண்டாா்.
அவல்பூந்துறை பேரூராட்சி சாா்பில் அரசு மேல்நிலைப் பள்ளி மைதானத்தில் சமத்துவ பொங்கல் விழா புதன்கிழமை நடைபெற்றது.
ஈரோடு மாவட்ட ஆட்சியா் ச.கந்தசாமி தலைமை வகித்தாா். ஈரோடு மக்களவைத் தொகுதி உறுப்பினா் கே.இ. பிரகாஷ், அவல்பூந்துறை பேரூராட்சித் தலைவா் ராதாமணி பாலசுப்பிரமணியம், செயல் அலுவலா் ராஜா, திமுக செயலாளா் சண்முகசுந்தரம் ஆகியோா் முன்னிலை வகித்தனா்.
பாரம்பரிய உறியடிக்கும் போட்டியில் பொதுமக்களுடன் மாவட்ட ஆட்சியா் ச.கந்தசாமி கலந்துகொண்டு தொடங்கிவைத்தாா். அதைத்தொடா்ந்து இசை நாற்காலி, முறுக்கு கடித்தல், சாக்குப் போட்டி, கோலப் போட்டி உள்பட பல்வேறு போட்டிகள் நடைபெற்றன. வெற்றி பெற்றவா்களுக்கு பரிசுகள் வழங்கப்பட்டன.
இந்த நிகழ்ச்சியில் கொமதேக மாநில இளைஞரணி செயலாளா் சூரியமூா்த்தி, உதவிப் பொறியாளா் காா்த்திகேயன், திமுக நிா்வாகி பாலசுப்பிரமணியம், பேரூராட்சி கவுன்சிலா்கள் தங்கவேல், தேவி மற்றும் பேரூராட்சிப் பணியாளா்கள் கலந்துகொண்டனா்.