உதகையில் வழித்தட விதிமுறைகளை மீறி இயக்கப்பட்ட 6 தனியாா் சிற்றுந்துகளை வட்டாரப் போக்குவரத்து அலுவலா் பறிமுதல் செய்தாா்.

உதகையில் இருந்து 15 கி.மீ. தூரம் உள்ள அரக்காடு பகுதிக்கு உதகை பேருந்து நிலையத்திலிருந்து தனியாா் சிற்றுந்துகள் இயக்கப்படுகின்றன. இதனால் அரக்காடு சுற்று வட்டாரப் பகுதியைச் சோ்ந்த ஏராளமான பொதுமக்கள் மற்றும் மாணவ,மாணவியா் பயனடைந்து வந்தனா்.

இந்நிலையில் கடந்த சில நாள்களாக உதகையிலிருந்து அரக்காடுக்குச் செல்லும் சிற்றுந்துகள் விதிமுறைகளை மீறி எல்லநள்ளியிலிருந்து திரும்பி விடுவதாகவும், அரக்காடு பகுதிக்கு வருவதே இல்லை எனவும், இதனால் சுமாா் 4 கிலோ மீட்டா் தூரம் வரை நடந்து சென்று அவதிப்படுவதாகவும் அப்பகுதி மக்கள் தொடா்ந்து குற்றம் சாட்டி வந்தனா். அதேபோல பள்ளி மற்றும் கல்லூரி செல்லும் மாணவா்களும் பாதிப்படைந்துள்ளனா்.

இதுகுறித்து நடவடிக்கை எடுக்குமாறு மாவட்ட ஆட்சியா் அலுவலகத்தில் பொதுமக்கள் புதன்கிழமை மனு அளித்தனா். இதையடுத்து மாவட்ட ஆட்சியா் அம்ரித் உத்தரவின் பேரில் வட்டாரப் போக்குவரத்து அதிகாரி தியாகராஜன் விசாரணை நடத்தினாா். இதில் தனியாா் சிற்றுந்துகள் விதிகளை மீறி பாதியில் திரும்பி வருவது தெரியவந்தது. இதைத் தொடா்ந்து 6 தனியாா் சிற்றுந்துகளை பறிமுதல் செய்ய உத்தரவிட்டாா். மேலும் அந்த சிற்றுந்துகளுக்கு தலா ரூ. ஆயிரம் வீதம் ரூ. 6,000 அபராதமும் விதிக்கப்பட்டது. பறிமுதல் செய்யப்பட்ட சிற்றுந்துகள் உதகை வட்டாரப் போக்குவரத்து அலுவலகத்தில் நிறுத்தப்பட்டுள்ளன.

இந்நிலையில் எல்லநள்ளியிலிருந்து அரக்காடு செல்லும் சாலை மிகவும் மோசமாக இருப்பதால்தான் சிற்றுந்துகள் செல்லவில்லை என நீலகிரி தனியாா் பேருந்து உரிமையாளா்கள் சங்கத்தினா் தெரிவித்ததைத் தொடா்ந்து, உதகை வட்டாரப் போக்குவரத்து அலுவலா் தியாகராஜன் அரக்காடு பகுதிக்கு நேரில் சென்று ஆய்வு செய்தாா்.