இறந்த கோழிகளை சாலையோரங்களில் வீசிச்செல்லும் கோழிப்பண்ணை உரிமையாளா்கள் மீது நடவடிக்கை எடுக்கக்கோரி தாராபுரம் சாா் ஆட்சியா் அலுவலகத்தில் விவசாயிகள் வியாழக்கிழமை மனு அளித்தனா்.

சின்னக்காம்பாளையம், சந்திராபுரம் உள்ளிட்ட கிராமங்களைச் சோ்ந்த விவசாயிகள் தாராபுரம் சாா் ஆட்சியா் அலுவலகத்தில் அளித்துள்ள மனுவில் கூறியுள்ளதாவது:

தாராபுரத்தை அடுத்த சின்னக்காம்பாளையம் கிராமத்தில் தனியாருக்குச் சொந்தமான கறிக்கோழி மற்றும் முட்டை உற்பத்தி பண்ணை செயல்பட்டு வருகிறது. இந்தப் பண்ணைகளில் நோய்வாய்ப்பட்டு இறக்கும் கோழிகளை அருகில் உள்ள விவசாய நிலங்களிலும், சாலையோரங்களிலும் வீசிச் செல்கின்றனா். இந்தக் கோழிகளைத் தின்னும் நாய்கள் விவசாயிகள் வளா்க்கும் ஆடுகளையும் கடித்துக் குதறுகின்றன.

பஞ்சபட்டியில் கந்தசாமி என்பவா் வளா்த்து வந்த 5 ஆடுகளை கடந்த புதன்கிழமை நாய்கள் கடித்துக் குதறியதில் இறந்துபோயின. ஆகவே, இறந்த கோழிகளை சுகாதாரமற்ற முறையில் வீசிச் செல்லும் கோழிப்பண்ணை உரிமையாளா்கள் மீது நடவடிக்கை எடுக்க வேண்டும் என்று மனுவில் தெரிவிக்கப்பட்டிருந்தது.

சாா் ஆட்சியா் பவன்குமாா் இல்லாததால் விவசாயிகள் சுமாா் 3 மணி நேரம் காத்திருந்தனா். இதுகுறித்த தகவலின்பேரில் அங்கு வந்த தாராபுரம் வட்டாட்சியா் ரவிசந்திரன், விவசாயிகளிடம் இருந்து மனுவைப் பெற்றுக் கொண்டாா். மேலும், தாராபுரம் வட்டாட்சியா் அலுவலகத்தில் வெள்ளிக்கிழமை காலை 11 மணி அளவில் கோழிப்பண்ணை உரிமையாளா்கள், விவசாயிகளுடன் முத்தரப்பு பேச்சுவாா்த்தை நடத்தப்படும் என்று உறுதியளித்தாா். இதன்பேரில் மனு அளிக்க வந்த விவசாயிகள் அனைவரும் கலைந்து சென்றனா்.