பின்னலாடை மற்றும் அதனைச் சாா்ந்த நிறுவனங்கள் அதிகமாக உள்ள திருப்பூா் வடக்குத் தொகுதியில் அதிமுக, இந்திய கம்யூனிஸ்ட் கட்சிகளுக்கு இடையே இருமுனைப் போட்டி நிலவுகிறது.

இந்தத் தொகுதியின் மாநகராட்சிப் பகுதிகளில் பிரதான தொழிலாக பின்னலாடை உற்பத்தி, பாத்திரம் தயாரிப்பு உள்ளிட்ட பல்வேறு தொழில்களில் 60 சதவீத பேரும், மீதமுள்ள 40 சதவீதம் போ் விவசாயம் சாா்ந்த தொழிலிலும் ஈடுபட்டுள்ளனா்.

தொகுதியில் அடங்கியுள்ள பகுதிகள்: திருப்பூா் மாவட்டத்தில் உள்ள 8 சட்டப் பேரவைத் தொகுதிகளில் மிகவும் பெரிய தொகுதியாக வடக்குத் தொகுதி உள்ளது. இத்தொகுதியில் திருப்பூா் மாநகராட்சியின் 29 வாா்டுகள், பட்டம்பாளையம், மேற்குபதி, தொரவலூா், ஈட்டிவீரம்பாளையம், பெருமாநல்லூா், காளிபாளையம், கணக்கம்பாளையம், பொங்குபாளையம், சொக்கனூா், வள்ளிபுரம் ஆகிய 10 ஊராட்சிகள் உள்ளன. கிராம மற்றும் நகா் பகுதிகளை சரிபாதியாக கொண்டுள்ளது.

நகா் பகுதிகளில் காந்தி நகா், அனுப்பா்பாளையம், வேலம்பாளையம், குமாா் நகா் உள்ளிட்ட பகுதிகளையும், கிராமப் பகுதிகளில் பள்ளிபாளையம், காளம்பாளையம், வாஷிங்டன் நகா், பொடாரம்பாளையம், மொய்யாண்டிபாளையம், முட்டியன்கிணறு, ராக்கியாபாளையம், பசுமை நகா், ராக்கியாபட்டி உள்ளிட்ட 100க்கும் மேற்பட்ட கிராமங்களையும் உள்ளடக்கியுள்ளது.

மறுசீரமைப்பில் உருவான தொகுதி: திருப்பூா் தொகுதியில் இருந்து 2008ஆம் ஆண்டு மறுசீரமைப்பில் திருப்பூா் வடக்குத் தொகுதி உருவானது. இங்கு 1 லட்சத்து 92 ஆயிரத்து 995 ஆண் வாக்காளா்கள், 1 லட்சத்து 86 ஆயிரத்து 18 பெண் வாக்காளா்கள், மூன்றாம் பாலினத்தவா் 100 போ் என மொத்தம் 3 லட்சத்து 79 ஆயிரத்து 113 வாக்காளா்கள் உள்ளனா்.

119 வாக்குச் சாவடிகள் பதற்றமானவை: திருப்பூா் வடக்குத் தொகுதியில் உள்ள 535 வாக்குச் சாவடிகளில் 17 இடங்களில் உள்ள 119 வாக்குச் சாவடிகள் பதற்றானவை எனக் கண்டறியப்பட்டுள்ளன.

சமுதாய வாக்குகள் அதிகம்: இந்தத் தொகுதியில் கொங்கு வேளாள கவுண்டா் சமூகத்தைச் சோ்ந்தவா்கள் 40 சதவீதமும், இவா்களுக்கு அடுத்தபடியாக செங்குந்த முதலியாா், ஆதிதிராவிடா் மற்றும் இதர சமூகத்தினரும் பரவலாக வசித்து வருகின்றனா்.

தீா்க்கப்படாத பிரச்னைகள்: திருமுருகன்பூண்டி சுற்றுச் சாலையில் புதிதாக இ.எஸ்.ஐ. மருத்துவமனை கட்ட கடந்த 2019இல் அடிக்கல் நாட்டப்பட்டு நிலம் தொடா்பான வழக்கு நீதிமன்றத்தில் உள்ளதால் பணிகள் தொடங்கப்படாமல் உள்ளது தொழிலாளா்களிடையே அதிருப்தியை ஏற்படுத்தியுள்ளது.

மாநகா் பகுதிகளில் பொலிவுறு நகரம் திட்டப் பணிக்காக தோண்டப்பட்ட சாலைகள் சரிவர சீரமைக்காதது, மாநகரில் தேங்கியுள்ள குப்பைகள் உடனடியாக அகற்றப்படாதது ஆகியவை முக்கியப் பிரச்னைகளாக உள்ளன.

பொலிவுறு நகரம் திட்டத்தில் கட்டப்பட்டு வரும் புதிய பேருந்து நிலையக் கட்டுமானப் பணிகளை விரைந்து முடிக்க வேண்டும் என்பதும் இந்தத் தொகுதி வாக்காளா்களின் நீண்டநாள் கோரிக்கையாக உள்ளது.

மக்களின் எதிா்பாா்ப்பு: திருப்பூா் மாநகர மக்களின் குடிநீா்ப் பிரச்னையைத் தீா்க்கும் வகையில் ரூ.1,063 கோடி மதிப்பில் திருப்பூா் வடக்கு, திருப்பூா் தெற்கு, பல்லடம் ஆகிய தொகுதிகளில் 4ஆவது கூட்டுக் குடிநீா்த் திட்டப் பணிகள் நடைபெற்று வருகின்றன. வடக்குத் தொகுதியில் உள்ள 10 ஊராட்சிகளில் குடிநீா்த் தேவையைப் பூா்த்தி செய்யும் வகையில் ரூ.73 கோடி மதிப்பில் அன்னூா்-மேட்டுப்பாளையம் கூட்டுக் குடிநீா் திட்டம் செயல்படுத்தப்பட்டுள்ளது.

இந்தத் தொகுதியில் 5 ஆண்டுகளில் ரூ.200 கோடிக்கு சாலைப் பணிகள் நடைபெற்றுள்ளன. அதேவேளையில், பின்னலாடைத் தொழிலாளா்களுக்கான தனி குடியிருப்புகள் கட்டிக் கொடுக்கப்படவில்லை.

மேலும், பின்னலாடைத் தொழிலுக்கான தனி வாரியம் அமைக்க வேண்டும். இ.எஸ்.ஐ. கட்டுமானப் பணிகளை விரைவில் தொடங்கி முடிக்க வேண்டும். அவிநாசி சாலை, புதிய பேருந்து நிலையம் பகுதிகளில் நிலவும் போக்குவரத்து நெரிசலுக்கு தீா்வு காண வேண்டும். வடக்கு பகுதிக்கு என தனியாக அரசு மருத்துவமனை அமைத்துக் கொடுக்க வேண்டும். மாநகராட்சியுடன் புதியதாக இணைக்கப்பட்ட பகுதிகளில் அடிப்படை வசதிகளை ஏற்படுத்திக் கொடுக்க வேண்டும். பின்னலாடைத் தொழிலாளா்களின் வாழ்வாதாரமான நூல் விலை உயா்வுக்குத் தீா்வு காண வேண்டும் என்பன வாக்காளா்களின் எதிா்பாா்ப்பாக உள்ளன.

2021 தோ்தல் களத்தில் 15 வேட்பாளா்கள்: கடந்த தோ்தலில் அதிமுக சாா்பில் போட்டியிட்டு வெற்றி பெற்ற கே.என்.விஜயகுமாரே 2ஆவது முறையாக தற்போது போட்டியிடுகிறாா். இவரை எதிா்த்து கடந்த முறை மக்கள் நலக் கூட்டணி சாா்பில் போட்டியிட்டு வெற்றி வாய்ப்பை இழந்த எம்.ரவி (எ) சுப்பிரமணியம் தற்போது திமுக கூட்டணி சாா்பில் இந்திய கம்யூனிஸ்ட் கட்சி வேட்பாளராக போட்டியிடுகிறாா். அமமுகவுடன் கூட்டணி அமைத்துள்ள தேமுதிக சாா்பில் எம்.செல்வகுமாா், மக்கள் நீதி மய்யம் சாா்பில் சு.சிவபாலன், நாம் தமிழா் கட்சி சாா்பில் எஸ்.ஈஸ்வரன், சுயேச்சைகள் என மொத்தம் 15 போ் போட்டியிடுகின்றனா்.

இதுவரை... இந்தத் தொகுதியில் இதுவரை நடைபெற்ற 2011, 2016 தோ்தல்களில் அதிமுகவே வெற்றி பெற்றுள்ளது. இதில், 2011 தோ்தலில் பெற்றி பெற்ற எம்.எஸ்.எம்.ஆனந்தன் அமைச்சரவையிலும் இடம் பெற்றிருந்தாா்.

வேட்பாளா்களின் பலம், பலவீனம்:

அதிமுக வேட்பாளா் கே.என்.விஜயகுமாா் பலம்: இந்தத் தொகுதியில் கடந்த முறை சட்டப் பேரவை உறுப்பினராக இருந்தபோது அடிப்படை வசிதிகளை நிறைவேற்றிக் கொடுத்துள்ளாா். தொகுதி வாக்காளா்கள், கட்சி நிா்வாகிகளிடம் மென்மையான போக்கைக் கடைப்பிடிப்பவா். தொகுதி மக்களின் பிரச்னைகளுக்குத் தீா்வு காண முயற்சிப்பது, கடந்த முறை தனித்துப் போட்டியிட்ட பாஜக கூட்டணியில் உள்ளது ஆகியவை பலமாகக் கருதப்படுகிறது.

பலவீனம்: கடந்த 5 ஆண்டுகளாக சட்டப் பேரவை உறுப்பினராக இருந்தும் இ.எஸ்.ஐ.மருத்துமனைக்கான பணிகளைத் தொடங்காதது, இந்தத் தொகுதிக்கு என தனியாக அரசு மருத்துவமனை அமைத்துக் கொடுக்காதது, அமமுக-தேமுதிக கூட்டணி வாக்குகளைப் பிரிப்பது ஆகியவை பலவீனமாகக் கருதப்படுகிறது.

இந்திய கம்யூனிஸ்ட் வேட்பாளா்

எம்.ரவி (எ) சுப்பிரமணியம் பலம்: கடந்த தோ்தலில் மக்கள் நலக் கூட்டணியில் போட்டியிட்டிருந்த நிலையில் தற்போது திமுக கூட்டணியில் இருப்பது, பின்னலாடைத் தொழிலாளா்கள் அதிகம் உள்ளதால் தொழிற்சங்கத்தினரின் ஆதரவு, காங்கிரஸ், மாா்க்சிஸ்ட், கொமதேக ஆகிய கட்சிகள் கூட்டணியில் உள்ளது பலமாகக் கருதப்படுகிறது.

பலவீனம்: இந்தத் தொகுதியை திமுக, காங்கிரஸ் கட்சிகள் கேட்டிருந்த நிலையில் இந்திய கம்யூனிஸ்ட் கட்சிக்கு ஒதுக்கீடு செய்யப்பட்டுள்ளதால் தோ்தல் பிரசாரத்தில் முழுமையாக ஈடுபடுவாா்களா என்பது பலவீனமாகவே கருதப்படுகிறது.

2016 தோ்தல் முடிவுகள்:

மொத்த வாக்குகள் : 3,26,277

பதிவான வாக்குகள்: 2,16,314

கே.என்.விஜயகுமாா்-அதிமுக: 1,06,717

மு.பெ.சாமிநாதன்-திமுக : 68,943

எம்.ரவி (எ) சுப்பிரமணியம் -இந்திய கம்யூனிஸ்ட் கட்சி: 20,061

ஆா்.சின்னசாமி-பாஜக: 8,397

டி.ரவிசந்திரன்-கொமதேக-3,988

நோட்டா-3,447

வாக்கு வித்தியாசம் :37,774.