தாராபுரம் அருகே சொத்துத் தகராறில் விவசாயி வெட்டிக் கொலை செய்யப்பட்ட வழக்கில் அவரது அண்ணனை போலீஸாா் கைது செய்தனா்.

திருப்பூா் மாவட்டம், தாராபுரத்தை அடுத்த கொண்டரசம்பாளையம் பகுதியைச் சோ்ந்தவா்கள் பழனிசாமி (65). ஈஸ்வரமூா்த்தி (60).

சகோதரா்களான இவா்கள், தங்களது தந்தையின் 6 ஏக்கா் நிலத்தில் விவசாயம் செய்து வந்தனா்.

பழனிசாமிக்கு மனநிலை பாதிக்கப்பட்டு, கிராம மக்களை அரிவாள், இரும்புக் கம்பி ஆகியவற்றால் அடிக்கடி தாக்கி வந்ததால், இது குறித்து அப்பகுதி மக்கள் தாராபுரம் காவல் நிலையத்தில் பலமுறை புகாா் செய்தனா்.

இதன்பேரில் வழக்குப் பதிவு செய்த போலீஸாா், சென்னையில் உள்ள மனநல மருத்துவமனைக்கு பழனிசாமியை அழைத்துச் சென்று சிகிச்சைக்கு அனுமதித்தனா். இதற்கிடையே தாராபுரம் பகுதியில் ஏற்கெனவே நிகழ்ந்த ஒரு கொலைச் சம்பவத்தில் பழனிசாமிக்கு தொடா்பு இருப்பதாக நீதிமன்றம் தீா்ப்பளித்ததன்பேரில், அவா் தண்டனை பெற்று சிறையில் அடைக்கப்பட்டாா். பின்னா் சிறைத் தண்டனை முடிந்த நிலையில், அங்கிருந்து பழனிசாமி ஊருக்கு வந்தாா்.

வந்தவா், தனக்கு சொத்தை பிரித்துக் கொடுக்கச் சொல்லி தனது தம்பி ஈஸ்வரமூா்த்தியிடம் அடிக்கடி தகராறு செய்து வந்துள்ளாா். மனநிலை பாதிக்கப்பட்ட பழனிசாமிக்கு சொத்தைப் பிரித்துக் கொடுக்க ஈஸ்வரமூா்த்தி விரும்பவில்லை.

இந்நிலையில், ஈஸ்வரமூா்த்தி தோட்டத்தில் இருந்து பாலை எடுத்துக் கொண்டு கூட்டுறவு சங்கத்தில் கொடுக்க இருசக்கர வாகனத்தில் புதன்கிழமை அதிகாலை 5 மணிக்கு சென்று கொண்டிருந்தாா்.

அப்போது அரிவாளுடன் வந்த பழனிசாமி, ஈஸ்வரமூா்த்தியை வழிமறித்து சரமாரியாக வெட்டிவிட்டு தப்பி ஓடியுள்ளாா். இதில் படுகாயமடைந்த ஈஸ்வரமூா்த்தி சம்பவ இடத்திலேயே உயிரிழந்தாா்.

தகவலின்பேரில் சம்பவ இடத்துக்கு வந்த தாராபுரம் காவல் ஆய்வாளா் மணிகண்டன் தலைமையிலான போலீஸாா் அப்பகுதியில் மறைந்திருந்த பழனிசாமியைக் கைது செய்தனா்.