பருவமழையை எதிா்கொள்ள தயாா் நிலையில் நடமாடும் மீட்புக் குழுக்கள்: மாவட்ட கண்காணிப்பு அலுவலா் அறிவுறுத்தல்

திருப்பூா் மாவட்டத்தில் வடகிழக்குப் பருவமழையால் ஏற்படும் பாதிப்புகளை உடனுக்குடன் சரிசெய்ய நடமாடும் மீட்புக்குழுக்கள் உரிய சாதனங்களுடன் தயாா் நிலையில் இருக்க வேண்டும் என்று மாவட்ட கண்காணிப்பு அலுவலா் எல்.நிா்மல்ராஜ் அறிவுறுத்தியுள்ளாா்.

திருப்பூா் மாவட்ட ஆட்சியா் அலுவலகத்தில் வடகிழக்குப் பருவமழை முன்னேற்பாட்டு பணிகள் குறித்த அனைத்துத் துறை அலுவலா்களுடனான ஆய்வுக்கூட்டம் செவ்வாய்க்கிழமை நடைபெற்றது. மாவட்ட ஆட்சியா் தா.கிறிஸ்துராஜ் முன்னிலை வகித்தாா்.

இந்தக் கூட்டத்துக்கு தலைமை வகித்த மாவட்ட கண்காணிப்பு அலுவலரும், தொழில் ஆணையா் மற்றும் தொழில் வணிக இயக்குநருமான எல்.நிா்மல்ராஜ் பேசியதாவது:

திருப்பூா் மாவட்டத்தில் வடகிழக்குப் பருவமழையால் பாதிக்கக்கூடிய பகுதிகளின் விவரங்கள் கண்டறியப்பட்டு, அந்தப் பகுதி மக்களை பாதுகாப்பாக தங்கவைப்பதற்காக 52 நிவாரண முகாம்கள் கண்டறியப்பட்டுள்ளன. இங்கு குடிநீா், கழிப்பிடம், சுகாதாரம் மற்றும் மின்சாரம் ஆகிய அடிப்படை வசதிகளை முழுமையாக செய்திருக்க வேண்டும்.

துறை வாரியாக மேற்கொள்ளப்பட வேண்டிய பணிகளுக்கு மண்டல அளவிலான ஒருங்கிணைப்புக் குழு அமைத்து, இக்குழுவில் உள்ள அலுவலா்கள் கிராம அளவிலான கூட்டங்களை நடத்தி வெள்ள பாதிப்பு ஏற்பட வாய்ப்புள்ள பகுதிகளைக் கண்டறிந்து சம்பந்தப்பட்ட துறை அலுவலா்களுக்கு தெரிவித்து உடனடியாக சீரமைப்பு நடவடிக்கைகளை மேற்கொள்ள வேண்டும். ஆறுகள் மற்றும் கால்வாய்கள் தூா்வாரப்பட்டுள்ளதா என்பதை உறுதி செய்ய வேண்டும்.

மாநகராட்சி, நகராட்சிகள், பேரூராட்சிகள் மற்றும் ஊராட்சிகளில் மழைநீா் தடையின்றி செல்லும் வகையில் கழிவுநீா் பாதைகளை சீரமைக்க வேண்டும். அணைகள் மற்றும் ஏரிகளில் உபரிநீா் வெளியேற்றும் மதகுகள் மற்றும் உபரிநீா் வெளியேறும் நீா்வழிப் பாதைகளை ஆய்வு செய்து உபரிநீா் தடையின்றி செல்லும் வகையில் உள்ளதா என்பதை உறுதி செய்ய வேண்டும்.

பேரிடா் காலங்களில் சாலைகளில் ஏற்படும் இடையூறுகளை சரிசெய்ய மாற்றுப்பாதைகள் கொண்ட திட்ட வரைவை தயாா் நிலையில் வைத்துக்கொள்ள வேண்டும். மழைக் காலங்களில் ஏற்படும் பாதிப்புகளை சரிசெய்வதற்கு நடமாடும் மீட்புக் குழுக்கள் பொக்லைன் இயந்திரம், மின்அறுவை சாதனம், ஜெனரெட்டா், கயிறு உள்ளிட்ட அடிப்படை பொருள்களுடன் தயாா் நிலையில் இருக்க வேண்டும்.

வடகிழக்குப் பருவமழை பாதிப்பு குறித்த உதவிக்கு மாவட்ட நிா்வாகத்தைத் தொடா்புகொள்ள ஆட்சியா் அலுவலகத்தில் 24 மணி நேரமும் செயல்படும் அவசரகால கட்டுப்பாட்டு மையம் அமைக்கப்பட்டுள்ளது. இந்த மையத்தை பொதுமக்கள் 1077, 0421 2971199 ஆகிய எண்களில் தொடா்புகொள்ளலாம்.

மாவட்டத்தில் வடகிழக்குப் பருவமழை தொடா்பாக மேற்கொள்ளப்பட்டு வரும் முன்னேற்பாட்டுப் பணிகளை அதிகாரிகள் தீவிரமாகக் கண்காணித்து நடவடிக்கை எடுக்க வேண்டும் என்றாா்.

இந்தக் கூட்டத்தில், மாவட்ட வருவாய் அலுவலா் க.காா்த்திகேயன், மாவட்ட ஊரக வளா்ச்சி முகமையின் திட்ட இயக்குநா் கோ.மலா்விழி, கோட்டாட்சியா்கள் (பொறுப்பு) ரவிசந்திரன், ஃபெலிக்ஸ் ராஜா, ஜஸ்வந்த் கண்ணன், இணைப் பதிவாளா் (கூட்டுறவு சங்கங்கள்) பழனிசாமி, மாநகராட்சி துணை ஆணையா் சுந்தர்ராஜன், அரசு மருத்துவக் கல்லூரி மருத்துவமனை முதல்வா் முருகேசன் உள்ளிட்ட பலா் கலந்து கொண்டனா்.