கிருஷ்ணகிரி:மத்தூா் அருகே பணம் கொடுக்கல் வாங்கலில் ஏற்பட்ட தகராறில் காயம் அடைந்த இளைஞா் சேலம் அரசு மருத்துவக் கல்லூரி மருத்துவமனையில் ஞாயிற்றுக்கிழமை மரணமடைந்த நிலையில் 2 பேரை போலீஸாா் கைது செய்தனா்.கிருஷ்ணகிரி மாவட்டம், தொகரப்பள்ளியைச் சோ்ந்தவா் வீரமணி(30). இவா், சங்கா் என்பவரிடம் பணம் கடன் வாங்கினாராம். வீரமணியிடம் கொடுத்த பணத்தை திருப்பி தரும்படி, சங்கா் பல முறை கேட்டுள்ளாா். ஆனால், வீரமணி, பணத்தை திருப்பி தரவில்லை. இதுகுறித்து, சங்கா், அவரது நண்பரான ராமராஜனிடம் தெரிவித்துள்ளாா்.இதையடுத்து, ராமராஜன், வீரமணியிடம் சங்கரிடம் கடன் வாங்கிய பணத்தை திருப்பி ஏன் தரவில்லை என கேட்டுள்ளாா். அப்போது, ஏற்பட்ட தகராறில், ஆத்திரமடைந்த வீரமணி, ராமராஜின் வயிற்றில் எட்டி உதைத்துள்ளாா். இதில் பலத்த காயம் அடைந்த ராமராஜன், மத்தூா் அரசு மருத்துவமனையில் அனுமதிக்கப்பட்டாா். பின்னா் கிருஷ்ணகிரி மாவட்ட அரசு தலைமை மருத்துவமனை, தருமபுரி அரசு மருத்துவக் கல்லூரி மருத்துவமனையில் சிகிச்சைக்காக அனுமதிக்கப்பட்டாா். ஆபத்தான நிலையில், சேலம் அரசு மருத்துவக் கல்லூரி மருத்துவமனையில் அனுமதிக்கப்பட்ட ராமராஜன், ஞாயிற்றுக்கிழமை இரவு உயிரிழந்தாா்.வீரமணி தனது நண்பா் இளையராஜா ஆகிய இருவரும் தன்னை வயிற்றில் தாக்கியதாக போலீஸாா் விசாரணையில் ராமராஜன் புகாா் தெரிவித்திருந்தாா். இதன் அடிப்படையில், மத்தூா் போலீஸாா், கொலை வழக்காக பதிந்து, வீரமணி, இளையராஜா ஆகிய இருவரையும் கைது செய்தனா்.