கிருஷ்ணகிரி மாவட்டத்தில் முதல்வரின் விரிவான மருத்துவக் காப்பீட்டுத் திட்டத்தில் 63,579 பேருக்கு ரூ.122.03 கோடி மதிப்பிலான சிகிச்சைகள் வழங்கப்பட்டுள்ளன.
இதுகுறித்து, மாவட்ட நிா்வாகம் சாா்பில் செவ்வாய்க்கிழமை வெளியான செய்திக் குறிப்பு:
கிருஷ்ணகிரி மாவட்டத்தில் 4 அரசு மருத்துவமனைகள், 18 தனியாா் மருத்துவமனைகள் என மொத்தம் 22 மருத்துவமனைகளில் தமிழக அரசு சாா்பில் முதலமைச்சரின் விரிவான மருத்துவக் காப்பீட்டு திட்டத்தின் மூலம் பல்வேறு அறுவை சிகிச்சைகள் மேற்கொள்ளப்பட்டு வருகின்றன.
மாவட்டத்தில் இதுவரையில் 63,579 பயனாளிகளுக்கு இலவசமாக அறுவை சிகிச்சை செய்யப்பட்டுள்ளது. இதன் மதிப்பு ரூ.122.03 கோடி ஆகும். விண்ணப்பித்த அனைவருக்கும் மருத்துவ காப்பீட்டு அடையாள அட்டைகள் வழங்கப்பட்டுள்ளன என்று தெரிவிக்கப்பட்டுள்ளது.