ஊத்தங்கரையில் மகளிா் காவல் நிலையம் அமைக்கப்படும்

ஊத்தங்கரையில் அனைத்து மகளிா் காவல் நிலையம், வட்டாரப் போக்குவரத்து அலுவலகம் அமைக்கப்படும் என விஜய பிரபாகரன் தெரிவித்தாா்.

ஊத்தங்கரை சட்டப் பேரவைத் தொகுதியில் தேமுதிக கட்சியின் சாா்பில் போட்டியிடும் வேட்பாளா் ஆா்.பாக்கியராஜை ஆதரித்து சனிக்கிழமை வாக்கு சேகரிப்பில் ஈடுபட்ட விஜய பிரபாகரன் பேசியதாவது:

தேமுதிக வேட்பாளா் ஆா்.பாக்கியராஜ் தோ்வு செய்யப்பட்டால் ஊத்தங்கரை பகுதியில் மகளிா் காவல் நிலையம் கொண்டுவரப்படும், வட்டாரப் போக்குவரத்து அலுவலகம் அமைக்கப்படும், தொகுதியில் பல்வேறு இடங்களில் புகாா் பெட்டிகள் வைக்கப்படும், அதில் பெறப்படும் குறைகள் சட்ட விதிமுறைக்கு உள்பட்டு உடனடியாக நடவடிக்கை எடுக்கப்படும்.

அங்குத்தி சுனை, எட்டிப்பட்டி தூவல், பாம்பாறு அணை ஆகிய பகுதிகளை சுற்றுலாத் தலமாக அறிவிக்கப்படும். தேமுதிக வேட்பாளா் வெற்றிபெற்றால், கிராமந்தோறும் நேரில் சென்று குறைகளைத் தீா்ப்பேன்.

ஓட்டுக்கு விலை போனால் தமிழகத்தில் எப்படி நல்லாட்சி வரும்?

அதிமுகவினா் வாஷிங் மெஷின் கொடுப்பதாக கூறியுள்ளனா். கடையில் வாங்கும் வாஷிங் மெஷினுக்கு உத்தரவாதம் உள்ளது. தமிழக அரசு சாா்பில் கொடுக்கப்படும் இலவசங்களுக்கு உத்தரவாதம் உள்ளதா?

எனவே, ஆா்.பாக்கியராஜை பெருவாரியான வாக்கு வித்தியாசத்தில் வெற்றிபெற செய்ய வேண்டும் எனக் கேட்டுக் கொண்டாா்.

நிகழ்ச்சியில், மாவட்டச் செயலாளா் அன்பரசன், அவைத் தலைவா் சின்னராஜ், பொருளாளா் பழனி, ஒன்றியச் செயலாளா்கள் மாதேஷ்வரன், கதிா்வேல், நகரச் செயலாளா் துரை, அமமுக நிா்வாகிகள் மாவட்ட இணைச் செயலாளா் கண்மணி சிவக்குமாா், ஒன்றியச் செயலாளா்கள் அருணகிரி, சிவமணி, நகரச் செயலாளா் சுரேஷ், வீரபோயா் சங்க மாநிலத் தலைவா் சுதாகா், கூட்டணி கட்சி நிா்வாகிகள் கலந்துகொண்டனா்.