காவலா்களுக்கு புத்தாக்கப் பயிற்சி

கிருஷ்ணகிரி மாவட்டம், ஊத்தங்கரை, சிங்காரப்பேட்டை, கல்லாவி, சாமல்பட்டி, மத்தூா் ஆகிய காவல் நிலையங்களுக்கு உள்பட்ட காவலா்களுக்கு புத்தாக்கப் பயிற்சி முகாம் சனிக்கிழமை நடைபெற்றது.

ஊத்தங்கரை பேரூராட்சி திருமண மண்டபத்தில் நடைபெற்ற இப்பயிற்சி வகுப்புக்கு, ஊத்தங்கரை துணை காவல் கண்காணிப்பாளா் அலெக்சாண்டா் தலைமை வகித்து காவலா்களுக்கு பல்வேறு அறிவுரைகளை வழங்கினாா்.

காவலா்கள் பொதுமக்களிடம் எவ்வாறு நடந்து கொள்ள வேண்டும், காவல் நிலையங்களுக்கு வரும் வழக்குகளை எவ்வாறு கையாள வேண்டும், கைதிகளை எவ்வாறு விசாரணை செய்ய வேண்டும், மது போதையில் உள்ள குற்றவாளிகளை எவ்வாறு கையாள்வது உள்ளிட்ட பல்வேறு கருத்துகளை கூறினாா்.

இதில், காவல் ஆய்வாளா்கள் லட்சுமி (ஊத்தங்கரை), பத்மாவதி (கல்லாவி), செல்வராஜ் (சிங்காரப்பேட்டை), 100-க்கும் மேற்பட்ட போலீஸாா் கலந்துகொண்டனா்.