ராசிபுரத்திலிருந்து வெண்ணந்தூர் வழியாக பவானிக்கு புதிய பேருந்து இயக்க வேண்டும் என காங்கிரஸ் கட்சி கோரிக்கை விடுத்துள்ளது. 
நாமக்கல் மாவட்டம், வெண்ணந்தூர் நகர காங்கிரஸ் செயல் வீரர்கள் கூட்டம் நகரத் தலைவர் கே. சிங்காரம் தலைமையில் வெண்ணந்தூரில் அண்மையில் நடைபெற்றது.
துணைத் தலைவர்கள் கே. தங்கமுத்து, வி. காசிபெருமாள் ஆகியோர் முன்னிலை வகித்தனர். செயலர் எம்.ஏ. வெங்கடாஜலம் வரவேற்றார். நிறைவேற்றப்பட்ட தீர்மானங்கள்:
கடந்த 8 மாதங்களாக பல அடுக்கு வரி விதிப்பால் விசைத்தறி நெசவாளர்கள் பெரிய பாதிப்புக்கு ஆளாகி வருகின்றனர். வரி விதிப்பால், தொழில் செய்வோர்கள் படும் வேதனையை மத்திய, மாநில அரசுகள் உணர வேண்டும்.
பல அடுக்கு வரி விதிப்பை ரத்து செய்துவிட்டு நூலுக்கு மட்டும் வரி என்ற நிலையை உருவாக்க வேண்டும். மத்திய அரசு, உடனடியாக, காவிரி மேலாண் வாரியத்தை அமைக்க வேண்டும்.
வெண்ணந்தூர் பேரூராட்சியில் உள்ள 5 மற்றும் 15-ஆவது வார்டுகள் பெரிய அளவில் உள்ளது. இந்த இரு வார்டுகளை மட்டும் நான்கு வார்டுகளாக உருவாக்கி, மறு வரையறை செய்ய வேண்டும்.
 வெண்ணந்தூர், அத்தனூர், ஆட்டையாம்பட்டி பகுதி மக்களின் நலனை கருதி  ராசிபுரத்தில் இருந்து வெண்ணந்தூர் வழியாக பவானிக்கு புதிய பேருந்து இயக்க வேண்டும்.