ஜேடர்பாளையம் அருகே உள்ள வடகரையாத்தூர் ஊராட்சிக்குள்பட்ட பகுதிகளில் தமிழக அரசின் கால்நடை பராமரிப்புத்துறை சார்பில் கால்நடைகளுக்கு கோமாரி நோய் தடுப்பூசி முகாம் செவ்வாய்க்கிழமை நடைபெற்றது.
 வடகரையாத்தூர், இந்திராநகர், ஜேடர்பாளையம் உள்ளிட்ட சுற்றுவட்டார பகுதிகளைச் சேர்ந்த சுமார் 300-க்கும் மேற்பட்ட கால்நடைகளுக்கு திடுமல் கால்நடை மருத்துவமனையின் உதவி கால்நடை மருத்துவர் சையது அஸ்லாம் தலைமையிலான குழுவினர் தடுப்பூசி போட்டனர்.
 இதையடுத்து, கோமாரி நோய் கால்நடைகளை தாக்காமல் இருப்பதற்கான வழிமுறைகளையும் விவசாயிகளிடம் எடுத்துக் கூறப்பட்டது. மார்ச் 21-ஆம் தேதி வரை நடைபெறும் கோமாரி நோய் தடுப்பூசி முகாமை கால்நடை வளர்ப்போர் பயன்படுத்திக் கொள்ள வேண்டும் என கால்நடை மருத்துவர்கள் தெரிவித்தனர்.