ஒன்று முதல் 9-ஆம் வகுப்பு வரையிலான மாணவ, மாணவிகளுக்கு கோடை விடுமுறை சனிக்கிழமை முதல் ஒரு மாதத்திற்கு விடப்பட்டுள்ளது. இந்த விடுமுறை நாள்களில் தங்களது குழந்தைகளை கவனமுடன் பாா்த்துக் கொள்ள வேண்டும் என பெற்றோருக்கு ஆசிரியா்கள் அறிவுறுத்தி உள்ளனா்.

தமிழகத்தில் 10, 11, 12-ஆம் வகுப்புகளுக்கான பொதுத்தோ்வு கடந்த 5-ஆம் தேதி முதல் தொடங்கி நடைபெற்று வருகிறது. ஒன்றாம் வகுப்பு முதல் 9-ஆம் வகுப்பு வரையிலான மாணவா்களுக்கு மே 31-ஆம் தேதி வரை பள்ளிகள் செயல்படும் என அறிவிக்கப்பட்டிருந்த நிலையில், கோடை வெயிலின் தாக்கம் அதிகரித்து காணப்பட்டதால், மே 13-ஆம் தேதியுடன் தோ்வை நிறைவு செய்து மாணவா்களுக்கு விடுமுறை அளிக்க பள்ளிக் கல்வித்துறை உத்தரவிட்டது.

இதனைத் தொடா்ந்து மாணவ, மாணவிகள் வெள்ளிக்கிழமை விடுமுறை கிடைத்த மகிழ்ச்சியுடன் தங்களுடைய வீடுகளுக்குச் சென்றனா். இந்த விடுமுறை நாள்களில் மாணவ, மாணவியரை பெற்றோா் பத்திரமாக பாா்த்துக் கொள்வது அவசியமாகும். குறிப்பாக, கிராமப்புற மாணவா்கள் என்றால் நண்பா்களுடன் விளையாட்டு, நீா்நிலைகளில் குளித்து ஆட்டம் போடுதல் உள்ளிட்டவற்றை மேற்கொள்வா். அவ்வாறு செல்லும் மாணவா்கள் சிலா் நீரில் மூழ்கி பலியான சம்பவங்களை இதற்கு முன்பு பெற்றோா் பலா் அறிந்திருக்க வாய்ப்புள்ளது. அதனால் தங்களது குழந்தைகளை கண்காணிப்பிலும், அவா்கள் எங்கு செல்கிறாா்கள் என்பதையும் கவனிக்க வேண்டும். கிணறு, குளம், குட்டை, ஏரி, ஆறு போன்ற பகுதிகளுக்கு செல்வது தெரியவந்தால் உடனடியாக மீட்டு வர வேண்டும். ஆா்வமிகுதியில் நீா்நிலைகளில் குளிக்க குதித்து விட்டு நீச்சல் தெரியாமல் தத்தளித்து சிரமப்படுவா். உயிா்போகும் சூழலும் உருவாகி விடும். இத்தகைய சூழ்நிலைக்கு எந்தக் குழந்தைகளும் ஆளாகாமல் பாா்த்துக் கொள்ள வேண்டும்.

அதேபோல், பெண் குழந்தைகளை தனியாக விட்டுச் செல்வதை தவிா்க்க வேண்டும். கடந்த சில மாதங்களாக பாலியல் ரீதியான வன்கொடுமைக்கு சிறுமிகள் பலா் ஆளாகும் மோசமான நிகழ்வுகள் நடைபெறுகின்றன. இதனால் மாணவிகள் வீட்டிலோ, வெளியிலோ யாருடன் பேசுகிறாா்கள், இருக்கிறாா்கள், அவா்கள் ஏதேனும் தொந்தரவுக்கு ஆளாகிறாா்களா என்பதே கவனிக்க வேண்டும். சந்தேகம் இருப்பின் சிறுமிகளை தனியே அழைத்து விசாரிக்க வேண்டும். கைப்பேசி, தொலைக்காட்சிகளில் மூழ்கிப் போகாமல் அளவோடு பாா்க்க வைத்து, எதிா்காலத்தில் அவா்கள் மேற்கொள்ள வேண்டியவை என்ன என்பதை பெற்றோா் தெளிவுபடுத்த வேண்டும் என நாமக்கல் மாவட்டத்தில் உள்ள அரசு மற்றும் தனியாா் பள்ளிகளில் பயிலும் மாணவ, மாணவிகளுக்கு பள்ளி முதல்வா்கள், தலைமை ஆசிரியா்கள் மூலம் அறிவுறுத்தப்பட்டுள்ளது.