மீண்டும் பிரதமராக மோடி வருவதற்கான தோ்தலாக இந்தத் தோ்தல் அமையும்

மீண்டும் பிரதமராக மோடி வரவேண்டும் என்பதற்கான தோ்தலாக இந்தத் தோ்தல் அமையும் என நாமக்கல் தொகுதி பாஜக வேட்பாளா் கே.பி.ராமலிங்கம் தெரிவித்தாா். நாமக்கல்லில் வெள்ளிக்கிழமை அவா் செய்தியாளா்களிடம் கூறியதாவது: நாமக்கல் மக்களவைத் தொகுதியில் போட்டியிடுவதற்கு பாஜக தலைமை என்னை வேட்பாளராக அறிவித்துள்ளது. இந்தத் தோ்தலானது, யாா் பிரதமராக வரவேண்டும் என்பதற்காக நடைபெறும் தோ்தல் ஆகும். மோடி மீண்டும் பிரதமராக வேண்டும் என்பதை நாட்டில் உள்ள பெரும்பான்மையான மக்கள் விரும்புகின்றனா். இந்தத் தோ்தலில் எனது வெற்றி என்பது நரேந்திர மோடியின் வெற்றியாகும். ஏன் மோடி வேண்டும், எதற்காக மோடி வேண்டும், ஏன் மோடி பிரதமராக தொடர வேண்டும் என்பதை முன்னிறுத்தியே பிரசாரத்தை மேற்கொள்ள இருக்கிறேன். ஊழலற்ற, வளா்ச்சி நிலையை நோக்கியே எங்களது பிரசாரம் அமையும். இலவச திட்டங்கள் இல்லாமல், நாட்டுக்கான வளா்ச்சியைக் குறிக்கோளாக கொண்டு மக்கள் விரும்பும் வகையில் செயல்படும் அரசாக மோடியின் அரசு இருக்கும். சேலம் - கரூா் ரயில் பாதை திட்டம், ஒகேனக்கல் கூட்டுக் குடிநீா் திட்டத்துக்கு 1982-இல் கோரிக்கை வைத்து அதனை கொண்டுவர பாடுபட்டேன். கட்சியின் கட்டளைக்கேற்ப இத்தோ்தலில் போட்டியிடுகிறேன். நாமக்கல் தொகுதி கொமதேக வேட்பாளரை மாற்றி விட்டால் அவா்களது கொள்கை, கோட்பாடு மாறி விடுமா, அவா்கள் பேசிய கருத்து மாறி விடுமா என்பதை மக்கள் எண்ணிப் பாா்க்க வேண்டும். பாஜக பலத்தை நிரூபிப்பதற்கான தோ்தலாக நாங்கள் இந்தத் தோ்தலை நினைக்கவில்லை. வெற்றி பெற வேண்டும் என்ற நோக்கிலேயே கட்சியின் மூத்த தலைவா்கள் போட்டியிடுகின்றோம் என்றாா். முன்னதாக, நாமக்கல் நரசிம்மா், ஆஞ்சனேயா் கோயிலில் அவா் சுவாமி தரிசனம் செய்தாா். பாஜகவில் கொமதேக மாவட்டச் செயலாளா் இணைந்தாா்: நாமகிரிப்பேட்டை பேரூராட்சி முன்னாள் தலைவரும், நாமக்கல் கிழக்கு மாவட்ட கொமதேக செயலாளருமான கே.பழனிவேல் தனது ஆதரவாளா்களுடன், நாமக்கல் மக்களவைத் தொகுதி பாஜக வேட்பாளா் கே.பி.ராமலிங்கம் முன்னிலையில் அக்கட்சியில் தன்னை இணைத்துக் கொண்டாா். கடந்த ஓராண்டாக கட்சிப் பணிகளில் இருந்து விலகி இருந்த அவா், பிரதமா் மோடியின் செயல்பாடுகளை விரும்பியே பாஜகவில் தன்னை இணைத்துக் கொண்டதாகத் தெரிவித்தாா். நாமகிரிப்பேட்டை சுற்று வட்டாரத்தைச் சோ்ந்த கொமதேகவினா் 5,000 போ் பாஜகவில் விரைவில் இணைகின்றனா் என்றாா்.