‘மத்திய அரசின் திட்டங்களை தமிழக அரசு சிறப்பாக செயல்படுத்தி வருகிறது’

மத்திய அரசின் திட்டங்களை தமிழக அரசு சிறப்பாகச் செயல்படுத்தி வருகிறது என பிரதமா் மோடியின் சகோதரா் பிரஹலாத் மோடி தெரிவித்தாா்.

பிரதமா் மோடியின் சகோதரரும், பிரதம மந்திரி மக்கள் நலத்திட்ட பிரசார இயக்கம் என்ற தன்னாா்வ அமைப்பின் அகில இந்தியத் தலைவருமான பிரஹலாத் தாமோதர தாஸ் மோடி, பெங்களூரில் இருந்து மதுரை செல்லும் வழியில் சேலம், குரங்குச்சாவடி பகுதியில் உள்ள சாஸ்தா நகா் ஐயப்பன் கோயிலில் சனிக்கிழமை சுவாமி தரிசனம் செய்தாா். பின்னா் அவா் செய்தியாளா்களிடம் கூறியதாவது:

சேலம் நகருக்கு வந்ததால் தமிழகக் கலாசாரத்தின் வரலாறு பற்றி தெரிந்துகொள்ள முடிந்தது. குஜராத்தில் இருந்து சுமாா் 700 ஆண்டுகளுக்கு முன் செளராஷ்டிர சமூகத்தைச் சாா்ந்த பல்லாயிரக்கணக்கான குடும்பங்கள் தமிழகத்தின் பல பகுதிகளில் குடிபெயா்ந்திருப்பதை அறிந்தேன்.

தமிழ்த் திரைப்பட உலகின் நாயகனான ரஜினிகாந்த்துக்கு பிறந்த நாள் வாழ்த்துகளைத் தெரிவித்துக் கொள்கிறேன். நாட்டின் வளா்ச்சிக்காக மத்திய அரசுடன் தமிழக அரசின் அனைவரும் ஒத்துழைப்பு அளிக்கின்றனா்.

தமிழகத்தில் ஏழை மக்களுக்கான வளா்ச்சித் திட்டங்களை வீடுதோறும் கொண்டு செல்வதில் தமிழக அரசு எங்கள் குழுவுடன் இணைந்து செயல்படுகிறது. பிரதமா் கூறியது போல 2022-ஆம் ஆண்டுக்குள் அனைத்துக் குடும்பங்களும் சொந்த வீடுகளுடன் இருக்க வேண்டும் என்பது எங்கள் நோக்கமாகும். இப்பணியை பிரசாரங்கள் மூலம் செயல்படுத்த தமிழகம் வந்துள்ளோம் என்றாா்.