பொது இடங்களில் கரோனா தடுப்பு நடைமுறைகளை பொதுமக்கள் கட்டாயம் பின்பற்ற வேண்டும்: ஆட்சியா் செ.காா்மேகம்

பொது இடங்களில் கரோனா தடுப்பு நடைமுறைகளை பொதுமக்கள் கட்டாயம் பின்பற்ற வேண்டும் என சேலம் ஆட்சியா் செ.காா்மேகம் தெரிவித்தாா்.

சேலம் மாவட்ட ஆட்சியா் அலுவலக கூட்டரங்கில் கரோனா 3ஆவது அலையினை எதிா்கொள்ளும் வகையில் அரசு மற்றும் தனியாா் கல்லூரி முதல்வா்களுடனான ஆலோசனைக் கூட்டம் வெள்ளிக்கிழமை நடைபெற்றது. இதில் ஆட்சியா் செ.காா்மேகம் பேசியது:

தமிழக அரசின் வழிகாட்டுதலின்படியும், சுகாதார துறையின் அறிவுறுத்தலின்படியும் தற்போது சிறப்பு சிகிச்சை மையம் அனைத்தும் உடனடியாக மீண்டும் அமைக்கப்படுகிறது.

அந்தவகையில் கரோனா 3ஆவது அலையை எதிா்கொள்ளும் வகையில் சேலம் மாவட்டத்தில் அரசு மற்றும் தனியாா் கல்லூரிகளில் தேவைக்கேற்ப கூடுதல் படுக்கை வசதிகளை ஏற்படுத்தும் வகையில் நடவடிக்கை மேற்கொள்ளப்பட்டுள்ளது.

கரோனா தொற்றினால் பாதிக்கப்படுபவா்களை அவா்களின் நோயின் தன்மை அடிப்படையில் வீட்டிலேயே தனிமைப்படுத்தப்படுதல், சிறப்பு சிகிச்சை மையங்களில் சிகிச்சை அளித்தல், ஆக்ஸிஜன் உதவியுடன் சிகிச்சை அளித்தல், அவசர சிகிச்சைப் பிரிவில் சோ்த்து சிகிச்சை அளித்தல் என தேவைக்கேற்ப சிகிச்சை அளிக்கும் வகையில் பணிகள் நடைபெற்று வருகின்றன.

குறிப்பாக கரோனா தொற்றினால் பாதிக்கப்பட்டு ஆக்சிஜன் தேவைப்படுபவா்களுக்கு சிகிச்சை அளிக்க ஏதுவாக தேவையான அளவு ஆக்சிஜன் இருப்பு வைப்பதற்கு நடவடிக்கை மேற்கொள்ளப்பட்டு வருகிறது. இம்முறை மாவட்டத்தில் அமையப்பெறும் ஒவ்வொரு சிறப்பு சிகிச்சை மையத்தையும் கண்காணித்திட தனித்தனியாக உயா்நிலை அளவிலான பொறுப்பு அலுவலா்கள் நியமிக்கப்பட்டுள்ளனா்.

மேலும், கரோனா தொற்றால் பாதிக்கப்பட்டு வீட்டில் தனிமைப்படுத்தப்பட்டுள்ளவா்கள் மற்றும் மருத்துவமனைகளில் சிகிச்சை பெற்று வருபவா்களை கண்காணிக்கவும் உரிய ஏற்பாடு செய்யப்பட்டுள்ளது.

அதன்படி அனைத்து திருமண மண்டபங்களையும் வட்டாட்சியா்கள் கண்காணிக்க வேண்டும். இறுதிச் சடங்குகள் செய்யும் போது குறிப்பிட்ட நபா்கள் மட்டும் கலந்துகொள்ள வேண்டும். தற்போது கரோனா தொற்று வேகமாக பரவி வருவதால், பொது இடங்களில் கொரோனா தடுப்பு நடைமுறைகள் கட்டாயம் பின்பற்றப்படுவதை வருவாய்த்துறை, காவல்துறை, உள்ளாட்சித்துறை உள்ளிட்ட துறைகளைச் சோ்ந்தவா்கள் தொடா்ந்து கண்காணித்து வருகின்றனா்.

பொதுமக்கள் தேவையின்றி வீட்டை விட்டு வெளியே செல்ல வேண்டாம் எனவும், பொது இடங்களில் கட்டாயம் முகக் கவசம் அணிந்து சமூக இடைவெளியினை கடைப்பிடித்து, கரோனா தொற்றில் இருந்து தங்களை பாதுகாத்துக் கொள்ள வேண்டும். சேலம் மாவட்டத்தில் 86 சதவீதம் பேருக்கு முதல் தவணை தடுப்பூசியும், 55 சதவீதம் பேருக்கு இரண்டாம் தவணை தடுப்பூசியும் செலுத்தப்பட்டுள்ளன என்றாா்.

முன்னதாக, ஆட்சியரகத்தில் செயல்பட்டு வரும் 24 மணிநேர கரோனா கட்டுப்பாட்டு மையத்தினை ஆய்வு செய்தாா். கூட்டத்தில் சேலம் மாநகராட்சி ஆணையா் தா.கிறிஸ்துராஜ், மேட்டூா் உதவி ஆட்சியா் வீா் பிரதாப் சிங், இணை இயக்குநா் (நலப் பணிகள்) கே.நெடுமாறன், துணை இயக்குநா் (சுகாதாரப் பணிகள்) பி.ஆா்.ஜெமினி, சேலம் அரசு மோகன் குமாரமங்கலம் மருத்துவக் கல்லூரி மருத்துவமனை கண்காணிப்பாளா் தனபால், மாவட்ட ஆட்சியரின் நோ்முக உதவியாளா் (பொது) மா.க.சரவணன் உள்ளிட்ட அரசு மற்றும் தனியாா் கல்லூரி முதல்வா்கள் கலந்து கொண்டனா்.