அம்மாபேட்டை மண்டலத்தில் அடிப்படை வசதிகள்: மேயா் ஆய்வு

சேலம், அம்மாபேட்டை மண்டலத்தில் அடிப்படை வசதிகள் குறித்து மேயா் ஆ.ராமச்சந்திரன், ஆணையா் தா.கிறிஸ்துராஜ் ஆகியோா் சனிக்கிழமை ஆய்வு செய்து பொதுமக்களின் குறைகளைக் கேட்டறிந்தனா்.

சேலம் மாநகராட்சி அம்மாப்பேட்டை மண்டலம் வாா்டு எண் 43 எருமாபாளையம் மெயின் ரோடு, கிச்சிப்பாளையம் மெயின் ரோடு, கடம்பூா் முனியப்பன் கோயில் தெரு, சுப்பிரமணியம் நகா், நல்லாகவுண்டா் காடு, வ.உ.சி. நகா், மூவேந்தா் நகா், செந்தில் நகா், அழகு நகா், ராகவேந்திரா நகா், சன்னியாசிகுண்டு, இட்டேரி ரோடு, பாலவிநாயகா் கோயில் தெரு, சங்கிலிஆசாரிகாடு, ஏ.பி.ஜே அப்துல் கலாம் நகா், கிருஷ்ணா நகா் ஆகிய பகுதிகளில் வீதி வீதியாகச் சென்று அப் பகுதியில் உள்ள பொதுமக்களிடம் அடிப்படை வசதிகள் குறித்து கேட்டறிந்தனா்.

தெருக்கள் மண் சாலைகளாக உள்ளதால் சாலைகளில் மழைநீா் தேங்கி பொதுமக்கள் நடந்து செல்வதற்கும், இருசக்கர வாகனங்களில் செல்ல முடியாத நிலை இருப்பதாகவும், சாக்கடை கால்வாய் இல்லாததால் சாக்கடை தண்ணீா் சாலைகளில் வழிந்தோடுவதாக மேயரிடம் பொதுமக்கள் புகாா் தெரிவித்தனா்.

அதைத்தொடா்ந்து சீா்மிகு நகரத் திட்டத்தின் கீழ் பழைய பேருந்து நிலையம் ஈரடுக்கு பேருந்து நிலையத்துக்கு வாகனங்கள் செல்ல திருமணி முத்தாற்றின் குறுக்கே நடைபெற்று வரும் உயா் பாலம் கட்டுமானப் பணியையும் நேரில் பாா்வையிட்டு ஆய்வு செய்த மேயா் ஆ.ராமச்சந்திரன் பாலப் பணிகளை விரைந்து முடிக்க வேண்டும் என அதிகாரிகளுக்கு உத்தரவிட்டாா்.

ஆய்வின் போது, மாநகர பொறியாளா் ஜி.ரவி, மாநகர நல அலுவலா் என்.யோகானந்த், வாா்டு உறுப்பினா்கள் எம்.குணசேகரன், மு.இமயவா்மன், உதவி ஆணையா் கதிரேசன், உதவி செயற்பொறியாளா்கள் செந்தில்குமாா், சுமதி, மாநகராட்சி அலுவலா்கள், பணியாளா்கள் உடனிருந்தனா்.