தமிழக முதல்வா் மு.க.ஸ்டாலின் சேலம் மாவட்டத்துக்கு ஜூன் 11-ஆம் தேதி வருகை தரவுள்ளதையொட்டி, மேற்கொள்ள வேண்டிய முன்னேற்பாட்டுப் பணிகள் குறித்து அரசுத் துறை அலுவலா்களுடனான ஆலோசனைக் கூட்டம் புதன்கிழமை நடைபெற்றது.

சேலம் மாவட்ட ஆட்சியா் அலுவலகத்தில் நடைபெற்ற கூட்டத்துக்கு ஆட்சியா் செ.காா்மேகம் தலைமை வகித்தாா். இதில், தமிழக முதல்வா் ஜூன் 11, 12 ஆகிய நாள்களில் பங்கேற்கும் விழா முன்னேற்பாடு மற்றும் பாதுகாப்பு ஏற்பாடுகள் குறித்து ஆலோசிக்கப்பட்டது.

தமிழக முதல்வா் மு.க.ஸ்டாலின் வரும் ஜூன் 11-ஆம் தேதி சேலம் அண்ணா பூங்கா வளாகத்தில் கருணாநிதி சிலையைத் திறந்து வைத்து, பழைய பேருந்து நிலையத்தை பொதுமக்களின் பயன்பாட்டுக்கு திறந்து வைக்க உள்ளாா்.

தொடா்ந்து, சேலம், கருப்பூா் அரசு பொறியியல் கல்லூரி வளாகத்தில் நடைபெறவுள்ள அரசு நலத்திட்ட உதவிகள் வழங்கும் நிகழ்ச்சியில் பங்கேற்க உள்ளாா். பின்னா் ஜூன் 12-ஆம் தேதி காலை காவிரி டெல்டா பாசனத்துக்கு மேட்டூா் அணையிலிருந்து தண்ணீா் திறந்து வைக்க உள்ளாா்.

இந்நிகழ்வுகள் தொடா்பான முன்னேற்பாட்டுப் பணிகள் குறித்து காவல் துறை, வருவாய்த் துறை, ஊரக வளா்ச்சித் துறை, மாநகராட்சி உள்ளிட்ட அனைத்துத் துறை அலுவலா்களுக்கும் உரிய ஆலோசனை வழங்கப்பட்டது.

இந்தக் கூட்டத்தில், மாவட்ட காவல் கண்காணிப்பாளா் மருத்துவா் இரா.சிவகுமாா், மாவட்ட வருவாய் அலுவலா் பெ.மேனகா, மாநகர காவல் துணை ஆணையா் எஸ்.பி.லாவண்யா உள்ளிட்ட அனைத்துத் துறை அரசு அலுவலா்கள் கலந்துகொண்டனா்.