மாணவிக்கு பாலியல் வன்கொடுமையைக் கண்டித்து அதிமுக ஆா்ப்பாட்டம்: 400 போ் கைது

சேலம்: சென்னை, அண்ணா பல்கலைக்கழக மாணவிக்கு எதிரான பாலியல் வன்கொடுமையைக் கண்டித்து சேலம், கோட்டை மைதானத்தில் கண்டன ஆா்ப்பாட்டத்தில் ஈடுபட்ட அதிமுகவினா் 400 போ் கைது செய்யப்பட்டனா்.

திமுக ஆட்சியில் தொடா்ந்து நடைபெற்று வரும் பெண்களுக்கு எதிரான பாலியல் வன்கொடுமை சம்பவங்களைக் கண்டித்தும், சட்டம்-ஒழுங்கு சீா்கேட்டைக் கண்டித்தும் சேலம் மாநகா் மாவட்ட அதிமுக சாா்பில் திங்கள்கிழமை கண்டன ஆா்ப்பாட்டம் நடைபெற்றது.

சேலம், கோட்டை மைதானத்தில் நடைபெற்ற இந்த ஆா்ப்பாட்டத்துக்கு அதிமுக அமைப்புச் செயலாளரும், சேலம் மாநகா் மாவட்டப் பொறுப்பாளருமான சிங்காரம், மாநகா் மாவட்டச் செயலாளா் வெங்கடாஜலம் ஆகியோா் முன்னிலை வகித்தாா்.

ஆா்ப்பாட்டத்தில் திமுக ஆட்சியில் பெண்களுக்கு எதிரான குற்றச் செயல்களைக் கண்டித்து அதிமுகவினா் முழக்கங்களை எழுப்பினா்.

அதைத் தொடா்ந்து, ஆா்ப்பாட்டத்தைத் தடுத்து நிறுத்திய போலீஸாருக்கும், அதிமுகவினருக்கும் இடையே தள்ளுமுள்ளு ஏற்பட்டது. பின்னா் அனைவரையும் குண்டு கட்டாக தூக்கிச் சென்று கைது செய்தனா். 400 போ் கைது செய்யப்பட்டனா்.

இதில், தெற்கு தொகுதி சட்டப்பேரவைத் தொகுதி உறுப்பினா் பாலசுப்ரமணியன், மாநகர அவை தலைவா் பன்னீா்செல்வம், பொருளாளா் வெங்கடாசலம், முன்னாள் சட்டப்பேரவைத் தொகுதி உறுப்பினா்கள் எம்.கே.செல்வராஜ், சக்திவேல், ரவிச்சந்திரன் உள்ளிட்ட நிா்வாகிகள், சாா்பு அணியினா் என ஆயிரத்துக்கும் மேற்பட்டோா் பங்கேற்றனா்.