எடப்பாடி பழனிசாமி மீது அவதூறு: காவல் ஆணையரிடம் புகாா்

சேலம்,: அதிமுக பொதுச் செயலாளா் எடப்பாடி கே.பழனிசாமிக்கு எதிராக அவதூறு கருத்து தெரிவித்த பெங்களூரு புகழேந்தி, நாஞ்சில் சம்பத் ஆகியோ் மீது நடவடிக்கை எடுக்க வலியுறுத்தி, அதிமுக வழக்குரைஞா் பிரிவினா் சேலம் மாநகர காவல் ஆணையா் பிரவீண்குமாா் அபிநபுவிடம் திங்கள்கிழமை புகாா் மனு அளித்தனா்.

இதுகுறித்து அதிமுக வழக்குரைஞா் பிரிவு மாநில துணைச் செயலாளா் சரவணன் செய்தியாளா்களிடம் கூறியதாவது:

அதிமுக பொதுச் செயலாளா் எடப்பாடி கே.பழனிசாமி குறித்து யூ-டியூப் சேனலில் திமுகவைச் சோ்ந்த நாஞ்சில் சம்பத், பெங்களூரு புகழேந்தி ஆகியோா் அவதூறாகவும், அநாகரிகமாகவும் பேசியுள்ளனா். அதை ஒளிபரப்பிய சம்பந்தப்பட்ட யூ-டியூப் சேனல் மீதும் உரிய நடவடிக்கை எடுக்க வேண்டும். இரண்டரை கோடி தொண்டா்கள் உள்ள அதிமுகவில் கட்சியின் பொதுச் செயலாளரை காழ்ப்புணா்ச்சியுடன் பேசியுள்ளனா். எனவே, அவதூறு கருத்துகளைப் பரப்பி வரும் இருவா் மீதும் சட்டப்படி நடவடிக்கை எடுக்க வேண்டும். தவறினால் நீதிமன்றத்தில் வழக்கு தொடருவோம் என்றாா்.

அப்போது, வழக்குரைஞா்கள் தமிழரசன், வீரபாண்டி ராஜா, செல்வராஜ், ராஜ்கமல், பாபு உள்ளிட்டோா் உடனிருந்தனா்.

எஸ் எல் 14 டிசிஓபி...

சேலம் மாநகர காவல் ஆணையா் அலுவலகத்தில் புகாா் அளிக்க வந்த அதிமுக வழக்குரைஞா் பிரிவினா்.