பொங்கல் பண்டிகைக்கு முன்பாகவே கூட்டணி அறிவிப்பு வெளியாகும் என்று அன்புமணி தரப்பைச் சோ்ந்த பாமக மாநில ஒருங்கிணைப்பாளா் மு.காா்த்தி கூறினாா்.

சேலத்தில் செவ்வாய்க்கிழமை அவா் செய்தியாளா்களிடம் கூறியதாவது: சேலத்தில் நடைபெற்றது பாமகவின் பொதுக்குழு கூட்டம் அல்ல. செயற்குழு உறுப்பினா்கள், பொதுக்குழு உறுப்பினா்களை வைத்து கூட்டம் நடத்தப்பட்டதாகக் கூறினால், யாா் யாா் பங்கேற்றனா் என்ற பட்டியலை அருள் வெளியிட வேண்டும்.

கூட்டத்தில் ராமதாஸ் குடும்பத்தினா் அன்புமணியை ஒருமையில் அவதூறாகப் பேசினா். பொதுவெளியில் இனி இதுபோன்று பேசினால் தக்க பதிலடி கொடுக்கப்படும். மருத்துவா் ராமதாஸ் சிலரது வேண்டுகோளுக்கு இணங்க செயல்பட்டுக் கொண்டிருக்கிறாா்.

ஜி.கே. மணி 1980லிருந்து பாமகவில் இருப்பதாக கூறுவது பொய். 1989இல் தான் அவரை மாவட்ட பாமக தொண்டா் படைக்கு கொண்டுவந்தோம். 2022 ஆம் ஆண்டு அன்புமணியைத் தலைவராக்க முற்பட்டபோது, அந்தப் பொறுப்பில் இருந்து விலக ஜி.கே.மணி 6 மாதங்கள் தாமதம் செய்தாா்.

பொதுக்குழு நாடகத்தில் பசுமை தாயகம் அமைப்பிலிருந்து சௌமியா அன்புமணியை நீக்கியதாக நிறைவேற்றப்பட்ட தீா்மானம் செல்லாது. ராமதாஸின் உறவினா் என்பதை தவிர சுகந்தனுக்கு எந்த தகுதியும் இல்லை.

பாமகவை எப்படியாவது உடைக்க வேண்டும் என ஜி.கே. மணியும், அருளும் செயல்பட்டு வருகின்றனா். கூட்டணியை அறிவிக்கப் போகிறாா்கள் என்ற எதிா்பாா்ப்புடன் ராமதாஸ் கூட்டிய பொதுக்குழுவுக்கு வந்தவா்களுக்கு ஏமாற்றமே மிஞ்சியது. கூட்டணியை அறிவிப்போம் எனக் கூறிவிட்டு, வெற்றிக் கூட்டணி அமைப்போம் என கூறுகிறாா்.

ராமதாஸ் தரப்பினரிடம் யாரும் கூட்டணி பேச்சுவாா்த்தை நடத்தவில்லை என்று அவா்களே கூறிவிட்டனா். ஆனால், தோ்தல் கூட்டணி பேச்சுவாா்த்தையில் அன்புமணி தொடா்ந்து ஈடுபட்டு வருகிறாா். பொங்கலுக்கு முன்பாக பாமக கூட்டணி குறித்த அறிவிப்பு வெளியாகும். திமுகவை வீட்டுக்கு அனுப்பும் வெற்றிக் கூட்டணியில் பாமக இடம்பெறும் என்றாா்.

மேட்டூா் எம்எல்ஏ சதாசிவம் கூறுகையில், சேலத்தில் கூடிய பொதுக்குழு என்பது வெறுப்பு அரசியல் கூட்டம். பாமகவை பிளவுபடுத்த திமுக பணம் கொடுத்துள்ளது என்றாா்.