பழனி பேருந்து நிலையம் அருகேயுள்ள துணிக்கடையில் பெண் வேடமிட்டு திருட வந்தவா் குறித்து போலீஸாா் விசாரணை நடத்தி வருகின்றனா்.

பழனி பேருந்து நிலையம் அருகே சிறுவா்களுக்கான ஆயத்த ஆடைகள் மற்றும் விளையாட்டு பொருள்கள் விற்பனை செய்யும் துணிக்கடை செயல்பட்டு வருகிறது. இக்கடையின் உரிமையாளா் சிக்கந்தா் வெள்ளிக்கிழமை கடையை பூட்டி விட்டு சனிக்கிழமை காலை திறந்துள்ளாா்.

அப்போது கடையில் உள்ள பொருள்கள் சிதறிக் கிடப்பதை பாா்த்து சிசிடிவி கேமரா பதிவுகளை பாா்த்துள்ளாா். அப்போது வெள்ளிக்கிழமை இரவு கடைக்குள் புகுந்த மா்ம நபா் பொருள்களை திருடிச் சென்றுள்ளதும், பெண் வேடமிட்ட அந்த நபா் முகக்கவசம், கைகளில் உறை அணிந்து கடைக்குள் பல இடங்களுக்குச் சென்று வருவதும், பொருள்களை எடுப்பதும் கேமராவில் பதிவாகியுள்ளது. கடையில் பணம் ஏதும் இல்லாததால் அந்த மா்ம நபா் பொருள்களை எடுத்துச் சென்றுள்ளாா். இந்த சம்பவம் குறித்து கடை உரிமையாளா் பழனி நகர காவல் நிலையத்தில் அளித்த புகாரையடுத்து வழக்குப் பதிவு செய்த போலீஸாா் சிசிடிவி காட்சிகளை வைத்து மா்ம நபரைத் தேடி வருகின்றனா்.