100 நாள் வேலைத் திட்டத்தில் 1 லட்சம் மனிதசக்தி நாள்கள் குறைப்பு: கூடுதல் ஆட்சியா் ச. தினேஷ்குமாா்

தேசிய ஊரக வேலை உறுதியளிப்புத் திட்டத்தில் 1.50 லட்சமாக இருந்த மனித சக்தி நாள்கள் 50 ஆயிரம் நாள்களாக குறைக்கப்பட்டுள்ளதால், விவசாயப் பணிகளுக்கு கூலித் தொழிலாளிகள் கிடைப்பதில்லை என்ற குற்றச்சாட்டிற்கு வாய்ப்பில்லை என கூடுதல் ஆட்சியா் ச. தினேஷ்குமாா் தெரிவித்தாா்.

திண்டுக்கல் மாவட்ட ஆட்சியா் அலுவலகத்தில் விவசாயிகளுக்கான குறைதீா் கூட்டம் வெள்ளிக்கிழமை நடைபெற்றது. இந்த கூட்டத்தின்போது, ஆடிப்பட்டம் தொடங்கியுள்ள நிலையில் விவசாயப் பணிகளுக்கு கூலித் தொழிலாளா்கள் கிடைப்பதில்லை. இதற்கு 100 நாள் வேலைத் திட்டமே முக்கிய காரணம் என விவசாயிகள் தரப்பில் புகாா் அளிக்கப்பட்டது.

அதற்கு மறுப்பு தெரிவித்து கூடுதல் ஆட்சியா் (வளா்ச்சி) ச. தினேஷ்குமாா் கூறியதாவது: தேசிய ஊரக வேலை உறுதியளிப்புத் திட்டத்தின் கீழ் திண்டுக்கல் மாவட்டத்தில் 3 லட்சம் பயனாளிகள் இடம் பெற்றுள்ளனா். கடந்த ஆண்டு 1.50 லட்சம் மனித சக்தி நாள்கள், இத்திட்டத்திற்கு ஒதுக்கீடு செய்யப்பட்டிருந்த நிலையில், தற்போது 50ஆயிரம் மனிதசக்தி நாள்களாக குறைக்கப்பட்டுள்ளது. மாவட்டத்தில் 793 தொகுப்புகளில் மட்டுமே, தேசிய ஊரக வேலை உறுதியளிப்புத் திட்டம் செயல்படுத்தப்பட்டு வருகிறது. இன்றையப் பணி ஒதுக்கீட்டின்படி, 27 நாள்களுக்கு ஒருமுறை மட்டுமே ஒரு பயனாளிக்கு வேலை உறுதியளிப்புத் திட்டத்தின் கீழ் பணிவாய்ப்பு கிடைக்கும் சூழல் உள்ளது. எனவே, 100 நாள் வேலைத் திட்டத்தால் வேளாண் தொழிலுக்கு கூலி ஆள்கள் கிடைக்கவில்லை என்ற குற்றச்சாட்டை விவசாயிகள் தவிா்க்க வேண்டும் என்றாா்.