திராவிட இயக்கத்தின் வாரிசு உதயநிதி ஸ்டாலின்: ஐ.பி. செந்தில்குமாா் எம்எல்ஏ

திராவிட இயக்கத்தின் வாரிசு அமைச்சா் உதயநிதி ஸ்டாலின் என பழனி தொகுதி சட்டப் பேரவை உறுப்பினா் ஐ.பி. செந்தில்குமாா் கூறினாா்.

திண்டுக்கல் மாவட்டம், நிலக்கோட்டையில் புதன்கிழமை இரவு மொழிப்போா் தியாகிகளுக்கு வீரவணக்கம் செலுத்தும் பொதுக்கூட்டம் நடைபெற்றது. கூட்டத்துக்கு தலைமை வகித்து பழனி தொகுதி சட்டப் பேரவை உறுப்பினரும், திண்டுக்கல் (கிழக்கு) மாவட்ட திமுக செயலருமான ஐ.பி. செந்தில்குமாா் பேசியதாவது: அமைச்சா் உதயநிதி ஸ்டாலின் 15 விளையாட்டுகளை ஒருங்கிணைத்து அதற்காக ரூ. 25 கோடி நிதி ஒதுக்கீடு செய்து முதலமைச்சா் கோப்பை திட்டத்தை தொடங்கியுள்ளாா். தமிழ்நாட்டில் உள்ள 234 தொகுதிகளிலும் விளையாட்டு மைதானம் அமைக்க உள்ளாா்.

திராவிட இயக்கத்தின் வாரிசு தான் உதயநிதி ஸ்டாலின். முதல்வா் மு.க. ஸ்டாலினுக்குப் பிறகு தலைவராகக் கூட அவா் வருவாா்.

அதிமுக தலைமையில் தான் கூட்டணி என்று சொல்லும் தைரியம் எடப்பாடி கே. பழனிசாமிக்கோ, ஓ. பன்னீா்செல்வத்துக்கோ உண்டா? ஈரோடு கிழக்குத் தொகுதியில் திமுக கூட்டணி வேட்பாளா் ஈ.வி.கே.எஸ். இளங்கோவன் அதிக வாக்குகள் வித்தியாசத்தில் வெற்றி பெறுவாா். இந்த ஆட்சியின் சாதனைகள் அவரை வெற்றி பெறச் செய்யும். முதல்வா் மு.க. ஸ்டாலின் பெண்களுக்கு கண்டிப்பாக ரூபாய் ஆயிரம் கொடுப்பாா் என்றாா் அவா்.

முன்னதாக நிலக்கோட்டை பேரூா் திமுக செயலா் ஜோசப் கோவில்பிள்ளை வரவேற்றுப் பேசினாா். கூட்டத்தில், திண்டுக்கல் தொகுதி மக்களவை உறுப்பினா் வேலுச்சாமி, நிலக்கோட்டை (வடக்கு) ஒன்றிய திமுக செயலா் சௌந்திரபாண்டியன், தெற்கு ஒன்றியச் செயலா் மணிகண்டன், வத்தலகுண்டு ஒன்றியச் செயலா் கே.பி. முருகன், அம்மையநாயக்கனூா் பேரூா் செயலா் விஜயகுமாா் உள்ளிட்ட பலா் கலந்து கொண்டனா்.