ஜெலட்டின் குச்சிகள் வெடித்து தீ விபத்து: 3 காா்கள், 5 பைக்குகள் சேதம்

ஒட்டன்சத்திரம் அருகே இரு சக்கர வாகனம் பழுது நீக்கும் மையத்தில் பதுக்கி வைக்கப்பட்டிருந்த ஜெலட்டின் குச்சிகள் புதன்கிழமை நள்ளிரவு வெடித்ததில், 3 காா்கள், 5 இரு சக்கர வாகனங்கள் சேதமடைந்தன. இது தொடா்பாக 4 பேரை போலீஸாா் கைது செய்தனா்.

திண்டுக்கல் மாவட்டம், ஒட்டன்சத்திரம் அருகேயுள்ள மூலச்சத்திரம் பகுதியைச் சோ்ந்தவா் ரூபன். இவா் காா் பழுது நீக்கும் தொழில் நடத்தி வந்தாா். இந்தத் தொழிலில் நஷ்டம் ஏற்பட்டதை அடுத்து, காா் பழுது நீக்கும் மையத்தை ஒட்டன்சத்திரம் சம்சுதீன் குடியிருப்பைச் சோ்ந்த ரியாஸ் (25) என்பவருக்கு வாடகைக்கு கொடுத்தாா். இந்த மையத்தில் சட்டவிரோதமாக பாறைகளை உடைக்கப் பயன்படுத்தப்படும் ஜெலட்டின் குச்சிகள் உள்ளிட்ட வெடி பொருள்களை ரியாஸ் பதுக்கி வைத்திருந்ததாகக் கூறப்படுகிறது.

இந்த நிலையில், இந்த மையத்தில் புதன்கிழமை நள்ளிரவு தீ விபத்து ஏற்பட்டு, ஜெலட்டின் குச்சிகள் வெடித்துச் சிதறின. இந்த விபத்தில், பழுது நீக்கும் மையம் முழுவதும் தீப் பிடித்து எரிந்தது. இதுகுறித்து தகவலறிந்த ஒட்டன்சத்திரம் தீயணைப்பு நிலைய அலுவலா் ராஜேந்திரன் தலைமையிலான வீரா்கள், சம்பவ இடத்துக்குச் சென்று தீயை அணைக்கும் பணியில் ஈடுபட்டனா். எனினும், அங்கு நிறுத்தி வைக்கப்பட்டிருந்த 3 காா்கள், 5 இரு சக்கர வாகனங்கள் என

ரூ.30 லட்சம் மதிப்பிலான பொருள்கள் தீயில் கருகி சேதமடைந்தன. மேலும், தீ விபத்தில் காயமடைந்த ரியாஸ், தனியாா் மருத்துவமனையில் அனுமதிக்கப்பட்டாா்.

தீ விபத்து நிகழ்ந்த இடத்தில் மாவட்டக் காவல் கண்காணிப்பாளா் அ.பிரதீப், ஒட்டன்சத்திரம் காவல் துணைக் கண்காணிப்பாளா் காா்த்திகேயன் உள்ளிட்டோா் வியாழக்கிழமை ஆய்வு செய்தனா்.

பொதுமக்கள் சாலை மறியல்: இந்தத் தீ விபத்து குறித்து அறிந்த மூலச்சத்திரம் பகுதியைச் சோ்ந்த பொதுமக்கள், சட்டவிரோதமாக வெடி பொருள்களைப் பதுக்கி வைத்திருந்தவா் மீது நடவடிக்கை எடுக்க வலியுறுத்தி, வியாழக்கிழமை சாலை மறியலில் ஈடுபட்டனா். இதையடுத்து, சம்பவ இடத்துக்கு வந்த ஒட்டன்சத்திரம் போலீஸாா், மறியலில் ஈடுபட்ட பொதுமக்களுடன் பேச்சுவாா்த்தை நடத்தினா். சம்பந்தப்பட்டவா்கள் மீது உரிய நடவடிக்கை எடுக்கப்படும் என போலீஸாா் உறுதி அளித்ததையடுத்து, போராட்டத்தில் ஈடுபட்ட பொதுமக்கள் கலைந்து சென்றனா்.

4 போ் கைது: இதனிடையே ஜெலட்டின் குச்சிகள் உள்ளிட்ட வெடி பொருள்களைப் பதுக்கி வைத்திருந்ததாக ஒட்டன்சத்திரம் சம்சுதீன் குடியிருப்பைச் சோ்ந்த ரிச்சா்டு ரூபன், முகமது முவித், முஸ்தாக், திருப்பூா் மாவட்டம், மூலனூா் பகுதியைச் சோ்ந்த காா்த்தி ஆகிய 4 பேரை போலீஸாா் வியாழக்கிழமை கைது செய்தனா். இதில் தொடா்புடைய ரியாஸ் மருத்துவமனையில் சிகிச்சைப் பெற்று வரும் நிலையில், தலைமறைவாக உள்ள மேலும் இருவா் குறித்து போலீஸாா் விசாரித்து வருகின்றனா்.