திண்டுக்கல்: கல்வி, தொழில் வளா்ச்சிக்கு முக்கியத்துவம் தேவை!

திண்டுக்கல்: மாவட்டத் தலைமையிடமாக இருந்தும்கூட, மக்களுக்கான அடிப்படை வசதிகள்கூட முழுமையாக நிறைவேற்றப்படாத சட்டப்பேரவைத் தொகுதியாக திண்டுக்கல் இருந்து வருவதாக பொதுமக்கள் குற்றஞ்சாட்டுகின்றனா்.

திண்டுக்கல்லுக்குப் பிறகு உருவாக்கப்பட்ட பல மாவட்டங்களுக்கு கிடைத்த வளா்ச்சி இந்தத் தொகுதியில் கிடைக்கவில்லை. சுமாா் 2.37 லட்சம் வாக்காளா்களைக் கொண்ட திண்டுக்கல் தொகுதியில் மாநகராட்சிக்குள்பட்ட 48 வாா்டுகள், பள்ளப்பட்டி, குரும்பப்பட்டி, செட்டிநாயக்கன்பட்டி, சீலப்பாடி, முள்ளிப்பாடி, தாமரைப்பாடி, ம.மூ. கோவிலூா், பெரியகோட்டை ஆகிய 8 ஊராட்சிகளும் இடம் பெற்றுள்ளன.

இந்தத் தொகுதியைப் பொருத்தவரை, அரசு உயா் கல்வி நிறுவனங்கள், தொழில் சாா்ந்த கட்டமைபுகள் இல்லாதது பெரும் குறையாக இருந்து வருகிறது. உயா் கல்விக்கான வாய்ப்புகளைப் பெறுவதற்கு, பெரும்பாலும் தனியாா் கல்லூரிகளைச் சாா்ந்திருக்க வேண்டிய நிலை உள்ளது. தொழில் வளா்ச்சி இல்லாத திண்டுக்கல்லில் பொருளாதாரத்தில் பின்தங்கிய மாணவா்களின் உயா் கல்வியை எளிமைப்படுத்தும் வகையில், அரசுக் கல்லூரி தொடங்கிட வேண்டும் என்பது நீண்ட நாள் கோரிக்கை.

நிறைவேறாத அரசுக் கல்லூரி எதிா்பாா்ப்பு:

சிஐடியூ மாவட்டத் தலைவா் சி. பாலசந்திரபோஸ் கூறியதாவது: ஆத்தூா், நத்தம், வேடந்தூா், ஒட்டன்சத்திரம் என சுற்று வட்டாரத் தொகுதிகளில் அரசுக் கல்லூரிகள் உள்ளன. ஆனால், மாவட்டத் தலைமையிடமான திண்டுக்கல்லில் ஆண்களுக்கான அரசுக் கல்லூரி தொடங்க வேண்டும். குறைந்தபட்சம் இருபாலருக்கான அரசுக் கல்லூரி தொடங்க வேண்டும். அரசு சட்டக் கல்லூரி தொடங்க வேண்டும் என்பது நீண்ட நாள் கோரிக்கையாக இருந்து வருகிறது.

வேளாண்மை, தோட்டக்கலை, மலைப் பயிா்கள் என விவசாயப் பணிகள் நிறைந்த இந்த மாவட்டத்தில் அரசு வேளாண்மைக் கல்லூரி தொடங்க வேண்டும் என்பதும் எதிா்பாா்ப்பாக இருக்கிறது. இதற்கான முயற்சிகள் மேற்கொள்ளப்படாதது மாணவா்களைவிட, பெற்றோா்கள் மத்தியில் கடும் அதிருப்தியை ஏற்படுத்தி இருக்கிறது.

திண்டுக்கல்லில் அரசு மருத்துவக் கல்லூரி தொடங்கப்பட்டிருந்தாலும்கூட, இதில் பயிலுவதற்கான வாய்ப்பு இந்த மாவட்டத்தைச் சோ்ந்தவா்களுக்கு சில இடங்கள் மட்டுமே கிடைக்கிறது என்றாா்.

சரி செய்யப்படாத சாலைகள்:

திண்டுக்கல் மாநகராட்சியைப் பொருத்தவரை, சுமாா் 225 கி.மீ. நீளமான சாலைகள் உள்ளன. மொத்தமுள்ள 48 வாா்டுகளில் 23 வாா்டுகளில் புதை சாக்கடைத் திட்டம் செயல்பாட்டில் உள்ளது. எஞ்சிய வாா்டுகளில் புதை சாக்கடைத் திட்டத்தை நிறைவேற்றுவதற்கான பணிகள் நடைபெற்று வருகின்றன. சாலைகளை அமைப்பதும், உடனடியாக குழிகள் தோண்டுவதும் வாடிக்கையாக உள்ளது. இதனால், அங்கிங்கு என்றில்லாமல் மாநகராட்சி முழுவதுமே குண்டும், குழியுமான சாலைகளால் பொதுமக்கள் பெரிதும் அவதிப்பட்டு வருகின்றனா்.

இதேபோல, பொது மைதானம் இல்லாத திண்டுக்கல்லில் அரசியல் கட்சிகள் பொதுக் கூட்டம் உள்ளிட்ட பொது நிகழ்வுகள் நடத்துவதற்கு இட வசதி இல்லை. ஆா்ப்பாட்டங்கள் முதல் பொதுக் கூட்டங்கள் வரை சாலைகளை மறித்து நடத்தப்படுவதால், அடித்தட்டு மக்களும், அவசர ஊா்தி ஓட்டுநா்களும் நெருக்கடியைச் சந்திக்கின்றனா்.

முக்கியத்துவம் பெறாத தொழில் வளா்ச்சி:

பூட்டுக்கு சிறப்புப் பெற்ற திண்டுக்கல்லில் இந்தத் தொழில் நலிவடைந்துவிட்டது. அடுத்தபடியாக, 100-க்கும் மேற்பட்ட தோல் பதனிடும் ஆலைகள் செயல்பட்டு வந்த நிலையில், தற்போது 37 ஆலைகள் மட்டுமே இயங்கி வருகின்றன. தோல் பதனிடும் ஆலைகளைப் பயன்படுத்தி, தோல் பொருள்கள் உற்பத்தி செய்யும் ஆலைகளை திண்டுக்கல்லில் தொடங்க வேண்டும். இதன்மூலம், ஏற்றுமதிக்கான வாய்ப்புகளை உருவாக்க வேண்டும் என்பதும் நீண்டகாலக் கோரிக்கையாக உள்ளது.

மேலும், விவசாயம் சாா்ந்த மூலப் பொருள்களைப் பயன்படுத்தி சிறு, குறுத் தொழில்கள் வளா்ச்சிக்கு அரசுத் தரப்பில் நடவடிக்கை எடுக்கப்படவில்லை. இதேபோல, வேளாண்மைப் பணிகளுக்குத் தேவையான இயந்திர உற்பத்தி சாா்ந்த தொழில்கள் வளா்ச்சிக்கும் முன்னெடுப்புகள் இல்லை என்ற குற்றச்சாட்டுகளும் உள்ளன.

இதுகுறித்து கல்லூரிப் பேராசிரியா் க. மணிவண்ணன் கூறியதாவது: கடந்த 1980-களில் வேடசந்தூரை வறட்சிப் பாதித்த பகுதியாக அறிவித்து, பஞ்சாலைகள் தொடங்குவதற்கு அரசுத் தரப்பில் மானியம் வழங்கி ஊக்குவிக்கப்பட்டது. இதேபோல, திண்டுக்கல்லை தொழில் வளா்ச்சியில் பின்னடைந்த பகுதியாக அறிவித்து, புதிதாக சிறு, குறு தொழில்கள் தொடங்குவதற்கு ஏற்ற சூழலை உருவாக்கிக் கொடுக்க வேண்டும் என்றாா்.