வாடிப்பட்டி அருகே 2016 இல் நடைபெற்ற ஜல்லிக்கட்டு போராட்ட வழக்கில் சென்னையைச் சோ்ந்த பெண் சமூக ஆா்வலரை வாடிப்பட்டி உரிமையியல் மற்றும் நீதித்துறை நடுவா் நீதிமன்றம் விடுதலை செய்து வெள்ளிக்கிழமை உத்தரவிட்டுள்ளது.

சென்னை அண்ணாநகா் மேற்கு மாணிக்கவாசகா் தெருவைச் சோ்ந்த நா்மதா நந்தகுமாா்(41). இவா் சமூக பிரச்னைகளை மையமாக வைத்து பல போரட்டங்களில் ஈடுபட்டு வருகிறாா். இந்நிலையில், 2016 டிசம்பா் 14 ஆம் தேதி மதுரை மாவட்டம் வாடிப்பட்டி அருகே பாலமேட்டில் உள்ள வாடிவாசல் பகுதியில் ஜல்லிக்கட்டுக்கு ஆதரவாக நா்மதா நந்தகுமாா் போராட்டத்தில் ஈடுபட்டாா். இது தொடா்பாக அலங்காநல்லூா் போலீஸாா் அவா் மீது வழக்குப் பதிவு செய்தனா். இந்த வழக்கு வாடிப்பட்டி உரிமையியல் மற்றும் நீதித்துறை நடுவா் நீதிமன்றத்தில் கடந்த 3 ஆண்டுகளாக நடைபெற்று வந்தது.

இந்நிலையில் இந்த மனு நீதித்துறை நடுவா் சிந்துமதி முன் வெள்ளிக்கிழமை விசாரணைக்கு வந்தது. வழக்கை விசாரித்த நீதித்துறை நடுவா், நா்மதா நந்தகுமாரை விடுதலை செய்து உத்தரவிட்டாா்.