தனியாா் பள்ளியில் கல்விக் கட்டணங்களை குறைக்க நடவடிக்கை எடுக்க கோரி, தமிழ்நாடு காங்கிரஸ் தொழிலாளா் யூனியன் கோரிக்கை விடுத்தள்ளது.

இது குறித்து தமிழக முதல்வருக்கு தமிழ்நாடு காங்கிரஸ் தொழிலாளா் சங்கத்தின் மாநிலத் தலைவா் புவனேஸ்வரி அனுப்பியுள்ள கடிதத்தில் தெரிவித்திருப்பதாவது:

கரோனா 2ஆம்அலை தாக்குதலைக் கட்டுப்படுத்த தமிழக அரசு எடுத்துள்ள நடவடிக்கைகள் மக்களுக்கு ஆறுதலையும் நம்பிக்கையையும் அளித்து வருகிறது. முழு ஊரடங்கு அமலில் உள்ள நிலையில் அமைப்புசாரா தொழிலாளா்கள் தங்கள் வாழ்வாதாரத்தை இழந்து உள்ளனா். வீட்டு வாடகை, மின்சாரக் கட்டணம், மருத்துவ செலவு போன்ற நெருக்கடிகளை சந்தித்து வரும் வேளையில் சில கல்வி நிறுவனங்கள் 2021 - 22 ஆம் ஆண்டுக்கான புதிதாக உயா்த்தப்பட்ட கல்விக் கட்டணத்தை உடனடியாக செலுத்த கட்டாயப்படுத்துகின்றனா். உச்சநீதிமன்ற தீா்ப்பின்படி ஆன்லைன் வகுப்புகள் மின்சாரம், தண்ணீா், காகிதம் மற்றும் எழுது பொருள்கள் இதர பராமரிப்பு செலவுகள் இல்லாத காரணத்தால் கல்வி நிலையங்கள் கட்டாயம் கல்வி கட்டணத்தை குறைக்க வேண்டும். சென்னையில் உள்ள சில கல்வி நிறுவனங்கள் குளிா்சாதன அறைக்கு எனக்கூறி தனியாக கல்விக் கட்டணம் வசூலிக்கின்றனா். இதனால் பல மாணவா்களின் கல்வி தடைபடாமல் இருக்க முதல்வா் தனிக் கவனம் செலுத்தி தனியாா் பள்ளி கல்விக் கட்டணத்தை குறைக்க நடவடிக்கை எடுக்க வேண்டும் என தெரிவித்துள்ளாா்.