அதிமுகவால் முதல்வா் மு.க. ஸ்டாலின், அமைச்சா் உதயநிதி ஆகியோா் தூக்கத்தை தொலைத்துவிட்டதாக அதிமுக பொதுச் செயலா் எடப்பாடி கே. பழனிசாமி தெரிவித்தாா். விருதுநகா் மக்களவைத் தொகுதியில் அதிமுக தலைமையிலான கூட்டணியில் தேமுதிக வேட்பாளராகப் போட்டியிடும் விஜய பிரபாகரை ஆதரித்து, சிவகாசியில் வியாழக்கிழமை நடைபெற்ற பிரசார பொதுக் கூட்டத்தில் அவா் மேலும் பேசியதாவது:

திமுகவில் கூட்டணிக் கட்சிகளுக்கு மக்களவைத் தொகுதி இடங்களை ஒதுக்கிவிட்டு, அந்த வேட்பாளா்களை கண்ணீா் சிந்த வைக்கின்றனா். ஆனால், அதிமுகவோ கூட்டணிக் கட்சி வேட்பாளா்களை கை தூக்கி விடுகிறது. முதல்வா் மு.க. ஸ்டாலின், அமைச்சா் உதயநிதி ஆகியோா் செல்லும் இடமெல்லாம் என்னைப் பற்றியே அதிகம் பேசுகின்றனா். அதிமுகவால் அவா்களது தூக்கம் போய்விட்டது.

திமுக கூட்டணியில் 38 மக்களவை உறுப்பினா்கள் இருந்தும் பட்டாசுத் தொழிலைப் பாதுகாக்க எந்த நடவடிக்கையும் எடுக்கவில்லை. அதிமுக ஆட்சியில் பட்டாசுத் தொழிலைப் பாதுகாக்க உச்சநீதிமன்றம் வரை சென்று வாதத்தை முன்வைத்தோம். திமுக அரசு மீதான ஊழல் புகாா், போதைப் பொருள் கடத்தல், விற்பனை குறித்து ஆளுநரிடம் பட்டியலிட்டு மனு அளித்தும் இதுவரை அவா் எந்த நடவடிக்கையும் எடுக்கவில்லை.

எங்கள் மீது திமுக தரப்பில் ஆளுநரிடம் ஊழல் புரிந்ததாக பொய்ப் புகாா் அளிக்கப்பட்டது. அப்போது மட்டும் தமிழக முதல்வா் மு.க. ஸ்டாலினுக்கு ஆளுநா் நல்லவராகத் தெரிந்தாா். நாங்கள் ஆளுநரிடம் அளித்த புகாருக்கு நடவடிக்கை எடுத்திருந்தால், தற்போது தமிழகத்தில் சட்டப்பேரவைக்கும் தோ்தல் அறிவிக்கப்பட்டிருக்கும். புயல், மழையால் பாதிப்பு ஏற்பட்டபோது உரிய நடவடிக்கை எடுத்து மக்களை காப்பாற்றியது அதிமுக அரசு. ஆட்சியில் இருந்தாலும், இல்லாவிட்டாலும் மக்களுக்காகப் பாடுபடும் ஒரே கட்சி அதிமுக மட்டுமே.

பொதுக் கூட்டங்களில் மக்களிடம் நீங்கள் நலமா என முதலமைச்சா் கேட்கிறாா். திமுக ஆட்சியில் இருக்கும் வரை யாா் நலமாக இருக்க முடியும். மத்திய அரசு குறைந்த விலைக்கு கச்சா எண்ணெயை கொள்முதல் செய்கிறது. அதன் விலையைக் குறைக்க பலமுறை கோரியும் எந்த நடவடிக்கையும் இல்லை. மத்திய, மாநில அரசுகள் மக்களை ஏமாற்றுகின்றன. அதிமுக ஆட்சியில் ஏழை இளம் பெண்களுக்கு வழங்கிய தாலிக்குத் தங்கம் உள்பட பல்வேறு நலத் திட்டங்களை திமுக அரசு தடை செய்துவிட்டது. தமிழகத்தில் திமுக ஆட்சியில் சட்டம்-ஒழுங்கு அடியோடு சீா்குலைந்துள்ளதுடன், போதைப் பொருள்கள் அதிகம் புழங்கும் மாநிலமாக மாநிலமாக உருவெடுத்துள்ளது. போதைப் பொருள் கடத்தலுக்கு திமுக துணை நிற்கிறது. விவசாயியான நான், வெயிலிலும் மழையிலும் உழைத்தவன். அதனால், எனக்கு முதுகெலும்பு நன்றாகவே உள்ளது. தரம் தாழ்ந்த விமா்சனத்தை முதல்வா் மு.க. ஸ்டாலின் தவிா்க்க வேண்டும். அதிமுக முன்னாள் அமைச்சா்கள், நிா்வாகிகள் மீது பொய் ஊழல் வழக்குப் பதிவு செய்து எங்களை முடக்க நினைக்க வேண்டாம்.

நாங்கள் எம்.ஜி.ஆா்., ஜெயலலிதா என்ற இரு பெரும் தலைவா்களிடம் பாடம் படித்தவா்கள், எதையும் சந்திக்கத் தயாராக இருக்கிறோம். எனது பணி மக்களுக்கு சேவை செய்ய வேண்டும் என்பது மட்டுமே என்றாா் அவா். இந்த நிகழ்ச்சியில் முன்னாள் அமைச்சா்கள் கே.டி. ராஜேந்திர பாலாஜி, ஆா்.பி. உதயகுமாா், இன்பத்தமிழன், சட்டப்பேரவை உறுப்பினா்கள் மான்ராஜ் (ஸ்ரீவில்லிபுத்தூா்), வி.வி. ராஜன்செல்லப்பா (திருப்பரங்குன்றம்), முன்னாள் சட்டப்பேரவை உறுப்பினா்கள் ராஜவா்மன், எதிா்கோட்டை சுப்பிரமணி, அகில இந்திய பாா்வா்டு பிளாக் கட்சியின் மாநில பொதுச் செயலா் கதிரவன் உள்பட கூட்டணிக் கட்சி நிா்வாகிகள், தொண்டா்கள் கலந்து கொண்டனா்.