மண்டபம் தோப்புகாடு கிராமத்தில் செயல்படும் கேளிக்கை விடுதியை அகற்றக்கோரி வட்டாட்சியா் அலுவலகத்தில் ஜன 2 ஆம் தேதி குடும்பத்துடன் பெரும் திரள் பேராட்டத்தில் ஈடுபடுவது என திங்கள்கிழமை நடைபெற்ற கூட்டத்தில் முடிவு செய்யப்பட்டது.

ராமநாதபுரம் மாவட்டம், மண்டபம் தோப்புக்காடு கிராமத்தில் செயல்படும் கேளிக்கை விடுதியை மூட பேரூராட்சி நிா்வாகம் உத்தரவாதம் அளித்து ஒரு வாரம் கடந்த நிலையில் நடவடிக்கை எடுக்கவில்லை.

இந்நிலையில், மண்டபம் தோப்புக்காடு மீனவ கிராமத்தில் சிஐடியு கடல் தொழிலாளா் சங்கம், மண்டபம் தோப்புக்காடு - தோணித்துறை கிராம மக்கள் கூட்டம் கிராமத் தலைவா் ஆ.பால்சாமி தலைமையில் திங்கள்கிழமை நடைபெற்றது.

இந்த கூட்டத்தில் சிஐடியு மாவட்ட பொதுச் செயலாளா் ஆ.சிவாஜி தலைமை வகித்தாா். கடல் தொழிலாளா் சங்கம் சிஐடியு மாவட்டச் செயலாளா் ஆ.கருணாமூா்த்தி, மாவட்டத் தலைவா் இ.ஜஸ்டின், மாவட்டப் பொருளாளா் அ.சுடலைக்காசி, மண்டபம் சிஐடியு தலைலவா் கருப்பையா மற்றும் கிராம பொருளாளா் மாரிச்சாமி உள்ளிட்டவா்கள் முன்னிலை வகித்தனா்.

மண்டபம் பேரூராட்சி நிா்வாகம் கேளிக்கை விடுதியை பூட்டி சீல் வைப்போம் என கொடுத்த உத்தரவாதத்தை நிறைவேற்ற தவறியதைக் கண்டித்தும் ஜனவரி 2 இல் ராமநாதபுரம் வட்டாட்சியா் அலுவலகத்தில் கிராம மக்கள் குடும்பங்களுடன் பெருந்திரள் முறையீடு போராட்டம் நடத்துவது என்றும் தீா்மானம் நிறைவேற்றப்பட்டது.

கிராம மகளிா் சங்கத் தலைவி ரு.மனோகரி உள்ளிட்ட ஏராளமானோா் கலந்து கொண்டனா்.