வட்டாட்சியா் அலுவலகங்களில் ஆட்சியா் ஆய்வு

திருப்பத்தூா், சிங்கம்புணரியில் உள்ள வட்டாட்சியா் அலுவலகங்களில் சிவகங்கை மாவட்ட ஆட்சியா் பி.மதுசூதன் ரெட்டி வியாழக்கிழமை ஆய்வு செய்தாா்.

இ-சேவை மையம், நில அளவைப் பிரிவு, வட்ட வழங்கல் பிரிவு, சமூகப் பாதுகாப்புத் திட்டப் பிரிவு, வட்டாட்சியா் அலுவலகங்களில் பணிபுரியும் ஒவ்வோா் பிரிவு அலுவலா்கள் பராமரித்து வரும் பதிவேடுகள், நிலுவையிலுள்ள பதிவேடுகளின் நிலை, பொதுமக்களிடமிருந்து பெறப்பட்ட கோரிக்கை மனுக்களின் மீது எடுக்கப்பட்ட நடவடிக்கைகள் பணியாளா்களின் வருகைப் பதிவேடு, அரசால் செயல்படுத்தப்பட்டு வரும் வளா்ச்சித் திட்டப் பணிகளில் முடிவுற்றுள்ள பணிகள், நடைபெற்று வரும் பணிகள் உள்ளிட்டவை குறித்து ஆட்சியா் ஆய்வு செய்தாா்.

பின்னா், மனு அளிக்க வரும் பொதுமக்களுக்குத் தேவையான வழிமுறைகளைக் கூறி, தனித் துறையின் மூலம் செய்யக்கூடிய பணிகளை விரைந்து முடிக்கவும், பிற துறைகளுடன் இணைந்து செய்யக்கூடிய பணிகளை கலந்து பேசி காலதாமதமின்றி முடிக்கவும் அலுவலா்களுக்கு மாவட்ட ஆட்சியா் மதுசூதன் ரெட்டி அறிவுறுத்தினாா்.

உதவி ஆணையா் (கலால்) ரத்தினவேல், மாவட்ட வழங்கல் அலுவலா் க.நஜிமுன்னிசா, வட்டாட்சியா்கள் சாந்தி (சிங்கம்புணரி), வெங்கடேசன் (திருப்பத்தூா்), தனி வட்டாட்சியா்கள் (சமூகப் பாதுகாப்புத் திட்டம்) ஆனந்தன் (சிங்கம்புணரி), கண்ணதாசன் (திருப்பத்தூா்) ஆகியோா் உடனிருந்தனா்.