போடி ஸ்ரீராமா் கோயில் உள்பட பெருமாள் கோயில்களில் ராம நவமியை முன்னிட்டு, புதன்கிழமை சிறப்பு பூஜை நடைபெற்றது.

தேனிமாவட்டம், போடி ஜக்கமநாயக்கன்பட்டி போஸ்பஜாா் தெருவில் அமைந்துள்ள ஸ்ரீராமா் கோயிலில் ஸ்ரீராமா், லட்சுமணன், சீதாதேவி, அனுமனுக்கு மஞ்சள், குங்குமம், பால், தயில், இளநீா், பஞ்சாமிா்தம், பன்னீா், சந்தனம், பழங்கள் உள்ளிட்ட 16 வகையான மங்கல பொருள்களால் அபிஷேகம் நடைபெற்றது.

பின்னா், பல வண்ண மலா்களால் அலங்காரம் செய்யப்பட்டு 7 வகையான தீபாராதணைகள் நடைபெற்றன. திரளான பக்தா்கள் கலந்து கொண்டு பொங்கல் வைத்து வழிபாடு நடத்தினா். ராம நவமி பூஜை ஏற்பாடுகளை கோயில் தலைவா் காமராஜ், செயலா் மாரிமுத்து, அா்ச்சகா் மாரிமுத்து, மகளிா் சங்க நிா்வாகிகள் செய்தனா்.

போடி ஸ்ரீநிவாசப் பெருமாள் கோயிலில் ஸ்ரீநிவாசப் பெருமாளுக்கு ராமா் அலங்காரம் செய்யப்பட்டு வழிபாடு நடத்தப்பட்டது. கோயில் அா்ச்சகா் ஸ்ரீநிவாசவரதன் என்ற காா்த்திக் பூஜை ஏற்பாடுகளை செய்திருந்தாா்.

போடி வினோபாஜி குடியிருப்பு ஸ்ரீமீனாட்சி சுந்தரேஸ்வரா் கோயிலில் உள்ள சங்கரநாராயணப்பெருமாள், போடி ஜக்கமநாயக்கன்பட்டி தொட்டராயன் ஒன்னம்மாள் திருக்கோயில், மேலச்சொக்கநாதபுரம் தொட்டராயன் ஒன்னம்மாள் திருக்கோயில், சிலமலை ஸ்ரீநிவாசப்பெருமாள் திருக்கோயில் உள்ளிட்ட கோயில்களிலும் ராம நவமி சிறப்பு பூஜைகள் நடைபெற்றன.