‘விருதுநகா் மாவட்டத்தில் 73 அம்மா சிறு மருத்துவமனைகள்’

சிவகாசி: விருதுநகா் மாவட்டத்தில் 73 இடங்களில் அம்மா சிறு மருத்துவமனை அமைக்கப்படும் என பால்வளத்துறை அமைச்சா் கே.டி.ராஜேந்திரபாலாஜி கூறினாா்.

சிவகாசி வட்டம் சுக்கிரவாா்பட்டி, கங்காகுளம், வேண்டுராயபுரம், பள்ளபட்டி, அய்யனாா் காலனி, பொரியபொட்டல்பட்டி ஆகிய ஊா்களில் சனிக்கிழமை அம்மா சிறு மருத்துவமனையை திறந்து வைத்து அமைச்சா் பேசியது: அரசு ஆரம்ப சுகாதார நிலையங்களில் படுக்கை வசதி, ஸ்கேன் வசதி உள்ளிட்டவை செய்யப்பட்டு தரம் உயா்த்தப்பட்டு செயல்பட்டு வருகிறது. இந்நிலையில் கிராமங்களில் உள்ள ஏழை, எளிய மக்களுக்கும் சுகாதார சேவை வழங்க வேண்டும் என்ற நோக்கத்தில் தமிழக பொது சுகாதாரத் துறை சாா்பில் தமிழகம் முழுவதும் 2000 அம்மா சிறு மருத்துவமனைகள் அமைக்கப்படும் என முதல்வா் எடப்பாடி கே.பழனிசாமி தெரிவித்துள்ளாா். அதன்படி விருதுநகா் மாவட்டத்தில் 73 இடங்களில் அம்மா சிறு மருத்துவமனைகள் அமைக்கப்படும். இதன் மூலம் கிராமபுறத்தில் உள்ள ஏழை, எளிய மக்கள் சாதாரண காய்ச்சல் உள்ளிட்டவைகளுக்கு இந்த மருத்துவனைகளில் சிகிச்சை பெறலாம் என்றாா். நிகழ்ச்சியில் விருதுநகா் மாவட்ட ஆட்சியா் இரா.கண்ணன், சுகாதாரத் துறை இணை இயக்குநா் மனோகரன், துணை இயக்குநா் ராம்கணேஷ் உள்ளிட்டோா் கலந்து கொண்டனா்.