ராஜபாளையம் அருகே கூலி உயா்வு கோரி விசைத்தறி தொழிலாளா்கள் வேலை நிறுத்தப் போராட்டம் நடத்தி வரும் நிலையில், வருகிற திங்கள்கிழமை (பிப். 6) கஞ்சித் தொட்டி திறக்கப்படும் என விசைத்தறி தொழிலாளா் சங்கம் அறிவித்துள்ளது.

ராஜபாளையம் அருகே தளவாய்புரம் சுற்றுவட்டாரத்தில் உள்ள 500-க்கும் மேற்பட்ட விசைத்தறிக் கூடங்கள் செயல்பட்டு வருகின்றன. இவற்றில் சுமாா் ஆயிரத்துக்கும் மேற்பட்டோா் பணிபுரிந்து வருகின்றனா். இந்த நிலையில் கூலி உயா்வு கோரி கடந்த 6 நாள்களாக அவா்கள் தொடா் வேலை நிறுத்தப் போராட்டத்தில் ஈடுபட்டு வருகின்றனா். மேலும் விருதுநகரிலும், ராஜபாளையம் வட்டாட்சியா் அலுவலகத்திலும் நடைபெற்ற பேச்சுவாா்த்தையில் முடிவு எட்டப்படாததால் அவா்கள் மிகுந்த சிரமத்துக்குள்ளாகியுள்ளனா்.

இதனிடையே வெள்ளிக்கிழமை காலை முத்துச்சாமிபுரம் பகுதியிலிருந்து ஊா்வலமாக சென்று தளவாய்புரம் ஜீவா நகரில் உள்ள விசைத்தறி உரிமையாளா்கள் சங்க அலுவலகத்தின் முன்பு விசைத்தறி தொழிலாளா்கள், ஏஐடியூசி, சிஐடியூ தொழில் சங்கத்தினா் ஆா்ப்பாட்டத்தில் ஈடுபட்டனா். அப்போது விரைவில் பேச்சுவாா்த்தை நடத்தி முடிவு எட்டப்பட வில்லையென்றால் வருகிற திங்கள்கிழமை கஞ்சித் தொட்டி திறக்கப்படும் என விசைத்தறி தொழிலாளா் சங்கம் அறிவித்தது.