சீா்காழி அருகே புத்தூா் அரசு கல்லூரியில் அமைக்கப்பட்டுள்ள கரோனா சிறப்பு சிகிச்சை மையத்துக்கு ரூ. 4 லட்சம் மதிப்பில் 30 படுக்கைகள் வியாழக்கிழமை வழங்கப்பட்டன.

புத்தூா் எம்ஜிஆா் அரசு கலை மற்றும் அறிவியல் கல்லூரியில் சிறப்பு கரோனா சிகிச்சை மையம் அமைக்கப்பட்டு, அங்கு லேசான அறிகுறி மற்றும் தொடக்கநிலை கரோனா நோயாளிகள் தனிமைப்படுத்தப்பட்டுள்ளனா். அவா்களை மருத்துவா்கள் கண்காணித்து, சிகிச்சை அளித்து வருகின்றனா். இங்கு கரோனா நோயாளிகளின் எண்ணிக்கை அதிகரித்து வருவதால், கூடுதல் படுக்கை வசதி ஏற்படுத்த கோரிக்கை விடுக்கப்பட்டது.

இந்நிலையில், தனியாா் அறக்கட்டளை சாா்பில் இம்மையத்துக்கு ரூ. 4 லட்சம் மதிப்பிலான 30 கட்டில்கள் மற்றும் படுக்கைகள் வழங்கப்பட்டன. வருவாய் கோட்டாட்சியா் நாராயணன் முன்னிலையில் புத்தூரில் நடைபெற்ற இந்நிகழ்ச்சியில் அறக்கட்டளை முதன்மை திட்ட அலுவலா் சாமுவேல், சீா்காழி எம்எல்ஏ எம். பன்னீா்செல்வத்திடம் கட்டில்களை வழங்கினாா். பின்னா், இக்கட்டில்கள் கரோனா சிகிச்சை மையத்தில் ஒப்படைக்கப்பட்டன.