திருநள்ளாறு கோயில் பிரமோத்ஸவத்தையொட்டி ஞாயிற்றுக்கிழமை இரவு பரிவேட்டை மற்றும் தெப்ப உத்ஸவம் நடைபெறவுள்ளது.
திருநள்ளாறு ஸ்ரீ தர்பாரண்யேசுவரர் கோயிலில் பிரமோத்ஸவம் நடைபெற்றுவருகிறது. முக்கிய நிகழ்ச்சியான தேரோட்டம் கடந்த வெள்ளிக்கிழமை நடைபெற்றது. திருவிழா நிறைவு நிகழ்ச்சியாக தெப்ப உத்ஸவம் ஞாயிற்றுக்கிழமை இரவு 9 மணியளவில் பிரம்ம தீர்த்தக் குளத்தில் நடைபெறுகிறது.
இதற்கு முன்பாக பரிவேட்டை என்கிற நிகழ்ச்சி நடைபெறுகிறது. தெப்ப நிகழ்ச்சியாக தீர்த்தக் குளத்தில் 3 முறை தெப்பம் வலம் வந்து சிறப்பு தீபாராதனையுடன் நிறைவுபெறுகிறது. பக்தர்கள் திரளாக கலந்துகொள்வர் என்பதால் குளத்தை சுற்றி பக்தர்கள் நிற்பதற்கான வசதிகளை கோயில் நிர்வாகம் செய்துள்ளது. திங்கள்கிழமை அதிகாலை 4 மணிக்கு ஸ்ரீ செண்பக தியாகராஜசுவாமி இடையனுக்கு காட்சிதரும் நிகழ்ச்சி நடைபெறுகிறது.
தொடர்ந்து 28-ஆம் தேதி திங்கள்கிழமை ஸ்ரீ நடராஜர் தீர்த்தவாரியும், காலை 10 மணிக்கு தங்க ரிஷப வாகனத்தில் ஸ்ரீ பஞ்சமூர்த்திகள் தங்க ரிஷப வாகனத்தில் வீதியுலாவும், இரவு 8 மணிக்கு கொடியிறக்கமும் செய்யப்படுகிறது.