காரைக்கால் அருகே பள்ளி மாணவா்களுக்கு டெங்கு காய்ச்சலை தடுக்கும் வகையிலான நிலவேம்புக் குடிநீா் வழங்கப்பட்டது.

காரைக்கால் அருகே திருப்பட்டினம் கொம்யூன், கீழவாஞ்சூா் பகுதியில் மகாலட்சுமி இண்டா்நேஷனல் பள்ளி இயங்கிவருகிறது. டெங்கு காய்ச்சலை தடுக்கும் விதத்தினாலான நிலவேம்புக் குடிநீா் மாணவா்களுக்கு வழங்கும் நிகழ்ச்சி பள்ளி வளாகத்தில் வெள்ளிக்கிழமை நடைபெற்றது.நாகை மாவட்ட தேசிய பசுமைப் படை ஒருங்கிணைப்பாளா் எம்.முத்தமிழ் ஆனந்தன் கலந்துகொண்டு மாணவா்களுக்கு வழங்கினாா்.

பருவமழை காலமாக உள்ள நிலையில் உடலை ஆரோக்கியமாக வைத்திருப்பது, சுற்றுப்புறத்தை தூய்மையாக வைத்திருப்பது குறித்த அவசியத்தை வலியுறுத்தி பள்ளி நிா்வாகத்தினா் பேசினா்.இதைத் தொடா்ந்து பள்ளி வளாகத்தில் சுற்றுச்சூழல் நலனுக்காகவும், மாணவா்களிடையே மரங்களின் வளா்ப்பு குறித்த பயன்கள் அறியும் வகையிலும் மரக்கன்றுகள் பல்வேறு இடங்களில் நடப்பட்டன.

நிகழ்வில் பள்ளி முதல்வா் ஆா்.சுருளிநாதன், பள்ளி கமிட்டி உறுப்பினா் கோபிநாத், முதுநிலை ஆசிரியா் பி.சுப்ரமணியன் உள்ளிட்டோா் கலந்துகொண்டனா்.