முறையான சாலை, சாக்கடை வசதி செய்யப்படாததால் வீடுகளில் இருந்து வெளியேறும் கழிவுநீா், சாலையில் தேங்கி வருவதாக புகாா் தெரிவிக்கப்படுகிறது.

காரைக்கால் மாவட்டம், நிரவி - திருப்பட்டினம் சட்டப்பேரவைத் தொகுதி, திருப்பட்டினம் பகுதி கீழையூா் தெற்கு கிராமத்தை சோ்ந்த எடத்தெரு புதுசாலை, பொதுமக்களுக்கு தொற்றுநோய் ஏற்படுத்தும் காரணியாக திகழ்வாக அந்த பகுதியினா் தெரிவிக்கின்றனா்.இதுகுறித்து அந்த பகுதியினா் மேலும் கூறியது : எடத்தெரு வட்டாரத்தில் நூற்றுக்கணக்கான குடியிருப்புகள் உள்ளன. குறிப்பாக புதுசாலையின் இருபுறத்தில் சுமாா் 40 வீடுகள் உள்ளன. இந்த சாலை மண் சாலையாகவே இருக்கிறது.

மழை காலங்களில் தண்ணீா் தேங்கி சதுப்புப் பகுதியாக மாறிவிடுகிறது.வீடுகளில் இருந்து கழிவுநீா் வெளியேறுவதற்கான சாக்கடை வசதி இல்லை. சாலை தாா் சாலையாகவோ அல்லது மண் சாலைக்கு மாற்றான சாலை அமைத்துத்தர நீண்ட காலமாக கோரிக்கை விடுத்தும் நிறைவேற்றப்படவில்லை. தற்போது வீடுகளில் இருந்து கழிவுநீா் வெளியேறி சாலையில் தேங்குகிறது என்றனா்.இதுகுறித்து அந்த பகுதியை சோ்ந்த இளைஞா் காங்கிரஸ் பிரமுகா் ராஜேந்திரன் கூறும்போது, எடத்தெரு பகுதியில் புதுசாலை என்பது பொதுமக்களுக்கு சுகாதாரக் கேட்டை உருவாக்கும் சாலையாகவே காட்சியளிக்கிறது.

மழைநீரும், வீடுகளின் கழிவுநீரும் சாலையின் மையப் பகுதியிலேயே தேங்கி இருக்கிறது. எந்நேரமும் துா்நாற்றம் வீசுகிறது. இச்சாலையில் இருசக்கர வாகனத்தில் பயணிப்பதே மிகவும் சிரமமாக உள்ளது.வீடுகளில் உள்ளோருக்கும், இச்சாலையில் பயணிப்போருக்கும் தொற்றுநோய் ஏற்படும் அபாயம் உள்ளது. திருப்பட்டினம் கொம்யூன் பஞ்சாயத்து நிா்வாகத்தினா் இந்த பகுதியை உடனடியாக பாா்வையிட்டு, கழிவுநீா் சாலையில் தேங்காத வகையில் விரைவாக நடவடிக்கை எடுக்கவேண்டும். பருவமழை ஓய்ந்த பின் தரமான சாலை அமைப்புக்கு ஏற்பாடு செய்யவேண்டும் என்றாா்.