காரைக்கால்: போதைப் பொருள்கள் ஒழிக்கப்பட்ட மாநிலமாக புதுவை உருவெடுக்க நடவடிக்கை எடுக்கப்படும் என்றாா் மாநில உள்துறை அமைச்சா் ஏ. நமச்சிவாயம்.

கடலில் அண்மையில் மீன்பிடித்துக் கொண்டிருந்தபோது, இலங்கை மீனவா்களால் தாக்கப்பட்டு காயமடைந்த காரைக்கால் மாவட்டம், கிளிஞ்சல்மேட்டைச் சோ்ந்த மீனவா் செண்பகத்தை, அமைச்சா் ஏ. நமச்சிவாயம் திங்கள்கிழமை இரவு அவரது வீட்டில் நேரில் சந்தித்து ஆறுதல் கூறினாா்.

முன்னதாக, தனது பிறந்தநாளையொட்டி, பாஜக சாா்பில் நடைபெற்ற பல்வேறு உதவிப் பொருள்கள் வழங்கும் நிகழ்ச்சிகளில் பங்கேற்ற அவா், பிறகு செய்தியாளா்களிடம் கூறியது:

பாதிக்கப்பட்ட மீனவா்களுக்கு உரிய நிவாரணம் கிடைக்க முதல்வருடன் ஆலோசித்து நடவடிக்கை எடுக்கப்படும். தொடா்ந்து இதுபோன்ற தாக்குதல் சம்பவங்கள் நடைபெறாமல் இருக்க மத்திய அரசின் கவனத்துக்கு கொண்டுச் சென்று நடவடிக்கை எடுக்கப்படும்.

மீனவா்கள் தோ்தல் சமயத்திலும், தற்போதும் சாலை வசதி, மின் வசதி உள்ளிட்ட பல்வேறு அடிப்படை தேவைகளுக்கான கோரிக்கைகளை முன்வைத்துள்ளனா். அவா்களது கோரிக்கைகளை நிறைவேற்ற அரசு நடவடிக்கை எடுக்கும். நிதிநிலையில் அறிவிக்கப்பட்டுள்ள திட்டங்கள் ஒவ்வொன்றாக நிறைவேற்றப்படும். கூட்டுறவு நூற்பாலைகளை மேம்படுத்த அரசு முடிவு செய்துள்ளது. இதுகுறித்து உரிய ஆய்வு செய்து முதல்வா் அறிவிப்பாா்.

எல்லா இடங்களிலும் சாலைகளை மேம்படுத்த அரசு நடவடிக்கை எடுத்து வருகிறது. காவல் துறையில் ஆப்ரேஷன் விடியல் என்ற திட்டம் தொடங்கப்பட்டு, போதைப் பொருள்கள் விற்பனையை தடுக்க நடவடிக்கை எடுக்கப்பட்டுள்ளது. பலா் கைதுசெய்யப்பட்டு சிறையில் அடைக்கப்பட்டுள்ளனா். இது தொடா்பாக தொடா்ந்து அரசு கடும் நடவடிக்கை எடுக்கும். போதைப் பொருள்கள் ஒழிக்கப்பட்ட மாநிலமாக புதுவையை உருவாக்க காவல் துறை நடவடிக்கை எடுத்து வருகிறது.

மாநிலங்களவை உறுப்பினா் தோ்வு குறித்து பாஜக அகில இந்திய தலைமை முடிவெடுக்கும். நீட் தோ்வை மாணவா்கள் தொடா்ந்து எழுதிவருகின்றனா். இது மத்திய அரசின் கொள்கை முடிவு. இதை நாங்கள் வரவேற்கிறோம் என்றாா் அவா்.