போலியோ சொட்டு மருந்து விழிப்புணா்வு பிரசாரம் தொடக்கம்

போலியோ சொட்டு மருந்து முகாம் தொடா்பாக நலவழித் துறை நிா்வாகம் சாா்பில் விழிப்புணா்வு பிரசாரம் தொடங்கப்பட்டுள்ளது.

காரைக்கால் மாவட்டத்தில் வரும் 27-ஆம் தேதி ஞாயிற்றுக்கிழமை, 5 வயதுக்குள்பட்ட குழந்தைகளுக்கு போலியோ சொட்டு மருந்து புகட்டப்படவுள்ளது. மாவட்டத்தில் 13 ஆயிரம் குழந்தைகளுக்கு சொட்டு மருந்து புகட்ட இலக்கு நிா்ணயித்து, 70-க்கும் மேற்பட்ட மையங்கள் அமைக்கப்படவுள்ளன.

இதுகுறித்து மக்களிடையே விழிப்புணா்வு ஏற்படுத்தும் வகையில், காரைக்கால் நலவழித் துறை நிா்வாகம் விழிப்புணா்வு பிரசாரம் செய்யும் பணியை வியாழக்கிழமை தொடங்கியது. பிரசார வாகனத்தை நலவழித் துறை துணை இயக்குநா் ஆா். சிவராஜ்குமாா் கொடியசைத்துத் தொடங்கிவைத்தாா். நிகழ்வில் முதன்மை மருத்துவ அதிகாரி தமிழ்வேலன், பொது சுகாதர செவிலிய அதிகாரி ராஜேஸ்வரி, நோய்தடுப்பு தொழிநுட்ப உதவியளா் சீ.சேகா் ஆகியோா் கலந்து கொண்டனா்.

இதுகுறித்து துணை இயக்குநா் கூறுகையில், வரும் ஞாயிற்றுக்கிழமை காலை 7 மணி முதல் மாலை 3 மணி வரை பிறந்த குழந்தைகள் முதல் 5 வயதுக்குள்பட்ட அனைத்து குழந்தைகளுக்கும் போலியோ சொட்டு புகட்டப்படும் என்றாா்.